絲絲講場：恒生董事會喜雙馮

馮孝忠馮婉眉都叫阿A

除咗大家都姓馮之外，原來兩人嘅英文名都係「A」字頭，果真巧合。馮婉眉洋名係Anita，馮孝忠叫Andrew，「AA」合作，一定有火花。

絲絲數數吓恒生嘅董事會名單，真係女性之光。Anita入局後，恒生嘅女董事人數增至五名，恒生成個board至得十六人，以百分比計，女性嘅比例，由28%升到31%，就算未計Anita，已經係咁多間藍籌公司入面最高嘅，計埋Anita，呢個「冧把溫」地位更加鞏固。如果絲絲冇記錯，呢個趨勢喺恒生女大班梁高美懿（Margaret）入局之後最為明顯，證明女性嘅能力愈嚟愈高。喺梁太未加入恒生前，絲絲淨係記得林李翹如做過唯一嘅恒生女董事。

「雙馮」入局，係因為梁永祥及馬凱博先後離職，而需填補，任期均為三年。Andrew今次入局都係大熱之選，早排梁永祥辭職唔做，市場已經「貼」佢會入局。根據滙豐集團嘅薪酬政策，Andrew 擔任恒生執董將不會收取任何董事酬金。佢依家出任財資業務及投資服務主管，每年可獲總固定薪金約320萬元。Anita將收取由恒生股東會議決通過之董事袍金，現時為每年34萬元。

余絲韻