市場熱線：茂業有條件反彈

匯金上次買錢莊股係○八年九月雷曼爆煲之後，尋日A股復市冇跟外圍仍係要跌，今日A股點計都會報復性反彈。不過，匯金冇講買貨金額，前排社保基金反而減持錢莊H股，如果外資認為匯金今次出手係因為有衰嘢跟尾嘅話，本地魚缸相信受惠程度唔大。

本地魚缸底子弱

尋日港股已經玩死人，先係德法禮拜日傾掂數救歐洲錢莊，加埋孖屐對美國今個禮拜公布嘅零售數據樂觀，美股期指應聲彈起，人仔放完假即刻生猛晒，祖國CDS亦大幅回落，只係差在A股唔生性。本來恒指上兩個交易日升1,500點，有啲回吐都好正常，但咁多好消息之下就覺得港股始終底子虛弱，臨尾挾升只係淡友霎時間陣腳大亂不能作準，而成交得604億元反映資金乾塘。

德法話救但又唔講點救，學埋伯南克出口術同拖字訣嗰招，拖到月尾跟住炒G20，而希臘亦拖到下月中，十月股災月有望安然度過。今日美國企業放榜期照例由「美女」揭開序幕，聽日施政報告公布前夕，本地地主股逆市上升，唔多驚推居屋，次佳表現嘅板塊就係內銀股。

國中（00202）老細賣枱狂升65%，朱太接貨成主要股東，但佢嘅主要資產國中水務就喺A股跌停板，瑞年（02010）開埋記者會解畫，雨潤（01068）亦重上10蚊關口，博大跌股好難話博唔博得過，但最緊要睇基本因素是否健全，以上各股有實力亦有缺點，話晒瑞年同雨潤嘅產品喺祖國通街都有得賣，而賣唔賣得亦唔使斷估。

黃金周依然賣得，全國零售同餐飲銷售額較舊年「十‧一」長假升咗17.5%，扣埋通脹6.5%，亦有一成左右增長，喺咁嘅環境已相當唔錯，而金銀珠寶同家電係消費熱點，尤其家電下鄉政策下個月就逐步結束，趁仲有着數就要趕搭尾班車，黃金周過後係零售股喜、內房股愁。

同檔次中質素高

傳話周大福如期以高PE上市，六福（00590）同周生生（00116）繼續反彈，銀泰（01833）公布首三季銷售額升38%，百貨股升得有道理，最犀利係春天百貨（00331）勁升16.7%，吼暴跌過後嘅細細粒百貨股隨時有驚喜，茂業國際（00848）跟住個市已經連升3日，但同高位比較仍然唔見六成。

金鷹（03308）、銀泰同百盛（03368）係屬於高層次，PE約20倍；新百貨（00825）、春天、茂業同佳華（00602）屬於較低層次，PE只係10倍左右，但當中茂業又質素較高，市值亦接近100億元，截至六月底喺17個城市經營同管理37間百貨店。近年祖國百貨公司二三線城市增長速度高過一線城市好多，所以茂業仍有反彈空間，值番12倍PE可值2.03元。

古勝