絲絲講場：花旗章晟曼醒你兩個靚冧巴
尋日絲絲去咗個畢業禮，大家可能諗點解咁早就有，其實係花旗搞嘅第二屆「花旗集團大學生社責實踐」計劃，花旗集團香港區行長章晟曼喺致詞時講咗兩個幸運數字，話大家要記住呢兩個號碼。絲絲心諗，唔通章行長知道大家喺股海沉咗好多，畀番幾個冧巴大家賺番啲。
等同學了解社會問題
絲絲梗係畀足心機聽啦，一個係35、一個係70，莫非係叫我哋買遠東發展同埋海王集團？原來章行長係想叫大家留意吓今次係有35間非牟利服務機構一齊合作，等70個嚟自8間大學的商科學生到佢哋機構實習，等班莘莘學子了解吓香港社會問題，更可以幫助非牟利服務機構，服務他人。
唔知係咪章行長號碼效應，勞工及福利局局長張建宗上到台亦都忍唔住畀咗兩個冧巴大家，一個28，一個3，原來張局長有傳統中國嘅祝福，就係祝大家「易發易發」，至於個3就係考起絲絲，張局長就話因為今次係第二屆，梗係希望長做長有，希望下年第三屆啦，真係估唔到局長咁風趣架喇！
余絲韻