絲絲講場：信証掛牌示威贈興
美國有「華爾街茉莉花革命」的「佔領華爾街」示威，尋日朝早我哋香港嘅核心金融區，中環都有示威行動噃！到底搞邊科？唔通有股民要效法，來個中區茉莉花革命！
事緣尋日就係近期最重磅嘅新股中信証券（06030）掛牌上市嘅大日子，絲絲就梗係去地處中環交易廣場嘅港交所（00388）湊吓熱鬧啦！
交易廣場平台派傳單
當絲絲行到交易廣場平台，正準備上樓上睇上市儀式嘅時候，就見到有幾個人戴住頂自製嘅黃色帽，喺度拉晒橫額、派晒傳單咁，絲絲初初仲以為係咩宣傳活動，就諗住借啲意行埋一邊渣渣林上樓上啦，點知其中一個哥哥就走埋嚟死都要遞張傳單畀絲絲喎，見佢咁積極，就惟有拎份睇吓啦。一望之下，原來咁啱同尋日掛牌嘅中信証券有關。
只憑呢幾位示威人士嘅一面之詞，當然就唔知件事嘅來龍去脈，而上市儀式完咗之後，中信董事長王東明答咗記者幾條問題之後，就畀PR姐姐拉走咗，冇回應到呢件事！
余絲韻