絲絲講場：風姐發惡大新擺設遭殃
上周四香港掛八號波，打亂咗唔少公司部署，但估唔到連大新銀行（02356）支「牙刷」都打亂埋。話說大新同領匯（00823）合作推出信用卡，原本安排嘅發布會因打風順延至尋日，點知放喺會場嘅擺設就此遭殃。
5呎長牙刷都整甩
大新信用卡業務主管歐陽少美（Winnie）同絲絲講，尋日嚟到會場時，個場面好似經颱風肆虐過，擺設中嘅牙刷成支掹甩咗，碗麵就畀人「走青」（麵上的葱花裝飾被拔走」。支牙刷保守估計超過5呎長，咁都整得甩，絲絲真係要寫個服字畀呢個風姐──納沙，認真係破壞王。
Winnie好肉緊咁話，幸好同事加緊搶修，啲擺設先回復舊觀，嚟緊啲擺設都會放喺商場內，希望大家好好愛護佢地啲心血結晶。
講番張信用卡，大新銀行執董藍章華話，首先會喺領匯嘅6個商場推簽帳優惠，之後再推廣至其他商場同店舖，希望首年發卡量有高五位數字，相信應該唔難達到啦。
余絲韻