絲絲講場：丁世民轉「朵」 校長變教授
大家都知廣發期貨（香港）副總經理丁世民（Simon）做咗期貨超過廿年，以前仲喺幾間大專院校教過期貨投資課程o架，所以行內行外都有唔少徒弟同埋學生，難怪有人會講笑咁叫佢做「丁校長」喇！不過，唔講你唔知，原來早前Simon返咗內地做投資講座，兼且見客，咁佢咪搖身一變，除咗丁校長外，變咗做丁教授添！
點解？Simon解釋：「我同佢哋講話自己做咗呢行好耐，喺香港有唔少學生，所以有個花名叫做丁校長。點知佢哋竟然自動幫我改名做丁教授，搞到我即刻澄清，個場面都幾好笑架！」
走訪內地做投資講座
其實自從Simon加入咗廣發期貨後，返內地見客嘅機會多咗好多，早前佢就喺兩個星期內走訪六、七個城市，好似話去咗番禺、佛山、惠州等多個地方做投資講座。嘩，日日都要舟車勞頓，你都咪話唔辛苦？所以尋日lunch時間，絲絲就請咗Simon飲番個老火湯，等佢補補身子嘛。事關，成日北上大陸，好易捱壞身子，不過，絲絲亦不忘提醒Simon，得閒都要喺番香港搞番多啲投資talk，因為喺香港，佢都有好多fans架！
余絲韻