市場熱線：內房股未脫危險期

恒指尋日升幅仲勁過上周二，創咗○九年四月以來最大升幅，次次反彈股民個心都十五十六，唔追怕蝕底，追咗怕損手，最安全策略當然好似古勝咁樣買定花生睇戲，但熊市反彈郁啲都一、兩成的確幾吸引，短炒當賭大細。

意大利問題被忽視

歐盟將援助希臘筆80億歐元貸款押後到下月中表決，陰謀論已話咗畀時間先救錢莊，先做好善後措施然後話之希臘破產，近日愈睇愈似，依家除咗諗緊點救錢莊之外，亦做埋壓力煲測試。80億歐元唔係多，歐盟唔知諗緊乜。

意大利兩次分別被標普同穆迪降級，加埋法蘭西錢莊降級嗰次，全球魚缸都係不跌反升，所以就算希臘破產亦未必大劑，隨時用短線升市嚟慶祝「割瘤」成功，但到時就到意大利有得震冇得瞓。

昨日大反彈，本以為有機會掀動一次較大規模的回補空倉潮，但結果頗令人意外，全日沽空金額94.9億元，與周二的95.7億元相若，可見大戶未有因為一日的大反彈而「認低威」。回顧八月初至今，港股平均沽空比例達9.79%，較一至七月的6.93%，高約四成一。

先不談沽空是否今次跌市元兇？事實是透過沽空股票賺錢，較大部分未曾參與過沽空的普羅股民想像中來得困難。要知沽空贏盡，是股價跌至零，可是實際股價跌有限，升無限，換句話一旦逆轉挾高，輸可以無止境。從操作上，沽空仲要考慮該股能否借到足夠貨源、借貨成本高低等等，例如近排不少長倉基金見股價跌得太殘，索性唔益淡友，唔再借貨出街，投行只能向無「take view」的指數基金借貨，部分內房、內需股及濠賭股，借貨成本抽高到5至8厘，從基金操作上，沽空的值博率係水瓜打狗，唔見一截。

港股報復性反彈，跌得多就升得多，主板十大升幅竟有3隻係濠賭股，全日上升股份超過千隻，但港交所（00388）早段最高升至107.4元之後，一度倒跌到99.15元的52周新低，收報101.6元仲保得住「紅底股」，但沽空金額達7億元，佔佢嘅成交近四成。港交所不嬲係港股嘅寒暑表，空軍揀中佢亦有睇死港股之嫌，而總沽空金額仍佔總成交11.3%，未驚過會被挾。

大升市仍有唔少下跌股，國中（00202）有洗倉暴瀉6成，公司市值跌到得11.7億元，但佢揸住嘅A股上市公司國中水務放假前市值則達55億人仔，以持有53.77%權益計算該批A股值36億港元，真係唔知點計數。但洗得倉嘅亦唔係一般人，玩民企股要驚隨時中招。

蘋果公司教主離世，會唔會影響其王朝眾說紛紜，有人認為蘋果公司喺個人電腦市場當年被列強瓜分，未來亦會重蹈覆轍。所謂花無百日紅道理，尤以科技產品為甚，諾基亞呢類手機巨頭一樣可以瓜直。其實「哎瘋」咁勁亦係一種潮流，買嘅人可能只係人有我有驚落後。

黃金周頭4日話祖國同胞仲多咗14.5%，內地景點人數亦多咗一成，呢類插針都插唔落嘅場面直情貼錢買難受，所以稍為有錢嘅都出國度假，內地遊客已成貴賓財神。香港亦係成街國語人，濠賭股同零售股鬆一口氣，但今個黃金周有9日兼兩個周末，數據上升會有水分。

內地樓市不容樂觀

祖國今個黃金周應該仍係一個消費旺季，但有消息話北京貴價車要減價兩成，車企已經一齊否認。「金九銀十」另一焦點係樓市，暫時睇情況不容樂觀，話出現價量齊跌，有內地傳媒形容情況變咗「冷九寒十」。今次溫州全民大耳窿賴債風波主要係炒燶樓引起，所以資金鏈斷裂影響最大嘅亦係樓市。

尋日內房股有理冇理跟住大市報復性反彈，雅居樂（03383）同中國海外（00688）分別升19%同17%，博反彈可以瞌埋眼衝落去，但長少少都要睇吓樓市有冇起色，否則寧願博珠寶股或消費股好過。內地黃金周樓市銷售數據會喺下個禮拜公布，部分內房股的確已較資產淨值有幾大折讓，但同用PE計指數一樣，PE係會隨住盈利能力去改變，樓價更可以升得快、跌得快，如果有一、兩間內房爆煲就隨時累街坊，暫時都係博唔過。

古勝