市場熱線：洗倉長痛不如短痛

溫總黃金周都好唔得閒，走去溫州督促救災，但今次唔係救天災，而係民間大耳窿觸發嘅人禍。其實民間大耳窿已出現半年，亦擺明唔合法，但阿爺見就快爆煲至出手干預，救得民間就輪到錢莊壞帳急升，所謂顧得個頭顧唔到個髻。

跌落萬六快過打針

若問港股跌夠未？當你手上嘅股票已由高位下跌7成，已經同股災冇乜分別，股民開始感到麻木，而購買力亦逐步消耗，禮拜二竟然一度倒升，令到衝動派散戶又一次以為見底回升，點知3點再一輪大屠殺，全日斬多571點，恒指得番16,250點，由萬八到萬六真係快過打針。

港股跌得零舍勁，沽空被指係罪魁禍首，上日沽空比例再超過12%，經紀團體建議禁止沽空港股，但香港成日攞「豉油港」做金漆招牌，其實自己戇居！本來沽空都唔係壞事，大戶鬥錢多，隨時挾到班空軍甩轆，以前沽空比例超過一成反而預示股市差唔多見底，但今次係極度反常，日日沽空都超過一成，所謂治亂世用重典，歐美可以禁沽空，點解香港唔得？只怪班高官覺得少做少錯，做事慢三拍。

老美又借人仔挑起事端，政棍猛話人仔升得少，但另方面大鱷則炒人仔貶值，唔通班鬼佬思覺失調？政棍每年例牌做騷，因為奉旨最終唔會通過，老美賴人仔搞到失業率高，但唔反省吓金融海嘯由邊個搞出嚟，連美國人自己都睇唔過眼，「佔領華爾街」運動愈搞愈大，而華爾街揸住好多歐洲錢莊債券亦開始受到「火燒連環船」波及，總之呢排七國咁亂，如果中美再爆發貿易戰嘅話，古勝都真係冇眼睇。

歐盟又將希臘筆援助貸款延期到下個禮拜四表決，一係就早啲畀，一係就踢希臘出局，拖拖拉拉最折磨，但有推測歐盟採拖字訣目的係諗緊辦法做好希臘違約之後嘅善後措施，點樣去救歐洲錢莊。其實呢排經濟數據唔算差，只不過視線被希臘單嘢遮蓋，中國9月非製造業指數按月升1.7個百分點至59.3，而滙豐綜合產出指數（覆蓋製造業同服務業）亦錄得51.5嘅3個月高位，美國製造業ISM指數更係出乎意料地上升。

強者之一嘅AIA（01299）卒之跌穿20蚊，大隻佬當中仍然有力嘅得祖國移動（00941）同電能（00006），同高位比較下調唔夠一成，但古勝唔相信有獨善其身呢支歌，你睇粵投（00270）、青啤（00168）、恒安（01044）咪一樣要跪低！不過，洗倉洗到強勢股未嘗唔係好事，代表就快見底，長痛不如短痛！

博反彈隨時輸入肉

濠賭股、本地電訊股、國美（00493）周二反彈，有唔少股民專吼大跌股博反彈，但呢類股反彈力度一次比一次弱，今次得幾個巴仙，隨時因小失大博唔過。澳門九月博彩收入按月減少14.2%，香港八月零售額升幅亦差過預期，如果黃金周冇黃金，濠賭股同零售股未有耐返到起步位。

古勝