「佔領華爾街」行動，被譽為金融界嘅茉莉花革命，已經喺美國遍地開花，花粉甚至吹至歐洲多國。可能華爾街嘅貪婪太離譜，就連股壇大鱷索羅斯都同情呢班革命倡議者。
話說索羅斯出席一個關於支援非洲農村發展計劃嘅發布會時，被問到對最近反華爾街示威嘅看法。索羅斯話，佢其實好支持示威者嘅立場，對示威者嘅心情亦感到理解，而且矛頭直指銀行大派花紅嘅做法。
索羅斯話，好多小商人依靠信用卡貸款經營，但自從○八年金融危機後，佢哋就眼白白睇住信用卡息率由8%大增至28%，好多小商人根本冇生意做。但銀行攞咗納稅人嘅錢而得到挽救，大賺之後又再大派花紅，與小商人嘅困境可謂兩個極端。