股災爆發，全世界都喺度回顧歷史，睇吓有無咩啟示，尋日絲絲就收到來自賓卡老友嘅轉發電郵，老友話圈內人不斷瘋傳，皆因夠晒詭異，配合晒傳統股災月氣氛，絲絲睇到之後都驚叫：好邪呀！
依家好多金融界人士，都會將今次一一年股災，同○八年金融海嘯作對比，標準普爾500指數前晚十月三日收報1,099.23點，點知喺○八年嘅十月三日，又係收1,099.23點，小數點都啱晒，真係有無咁「蹺」呀喂！咁呢個指數又有咩啟示呢？絲絲查番當年，標普500見1,099.23點之後，要到十一月二十日，落到752.44點先至見底，跌幅有成31.5%！
呢個現象令絲絲諗到恒指又點呢？點知兩年個勢又真係幾似，○八年同一一年嘅八月一日，恒指分別收響22,800同22,600點水平，其後今年八月美國被降評級，呢兩年嘅九月中，恒指巧合地都收喺17,600點附近。而○八年十月六日恒指收16,803點，同尋日恒指收16,250又係咪好似？
結果，○八年恒指到十月二十七日先至喺11,015點先見底！如果同尋日恒指比，咁咪即係呢個月仲有32%跌幅！歷史係咪不斷重演絲絲唔知，不過數據就可作參考，同埋當個警號。
余絲韻