市場熱線：外圍變數多勿衝動

十月好難估，古勝暫時觀望為主，持貨亦傾向短炒，再沽驚冇水位，太多股災言論慎防被挾；大淡友唱到目標係萬二點，即係仲有6,000點下跌空間，但觸發股災又未有咁快，就算希臘破產亦唔新鮮，所謂長痛不如短痛，希臘破產隨時係壞消息入貨良機，依家歐盟保住錢莊為先，希臘救得就救。

孖屐太多真真假假傳言好難消化，雖然芬蘭同德國先後通過擴大EFSF，德國執政黨亦免除內訌，但EFSF究竟有冇槓桿化像霧又像花，如果得4,400億歐元明顯醫到頭醫唔到腳，但槓桿化至2萬億歐元等同借孖展炒股風險太大。提出2萬億歐元有拋浪頭性質，一於好似玩話事啤咁樣「晒冷」，希望暫時止住血先。

內地股民套現放假

雖然美股隔晚低收，但道指期貨回升，所以尋日亞洲魚缸亦先低後高，日股倒升1%，韓股升2.68%最勁，新加坡微升，數落得滬綜指跌逾1%最差，再試一年幾新低位，「十‧一」長假前夕沽貨套現嘅心態更濃，上升同下跌股數係1比10；天宮一號尋晚發射，但航天股反高潮跌停板，香港隻中航科工（02357）呢排走勢亦非常之差，但跌到兩蚊已屆吸引水平。

溫州已有29個欠債老闆走佬，大耳窿咁貴息，唔走佬至奇。希臘亦係頂唔順高息，但成個國家冇得走佬，唯一方案就係要求債主削債，削債都係冇兩、三成啫，但走咗佬就乜都冇。祖國民間高利貸有幾大鑊冇人知，但九月上半月銀行存款突然少咗4,200億人仔，可想而知隻耳窿肯定唔細，祖國有地方債務危機、鐵路債務危機、民間借貸危機，自身難保點做救世主？

港股休市仍有通告，新世界系兩公司派成績表，罕王（03788）股如其名得兩成公開認購，上氣（02727）簽核電主泵合約。前晚通告有：鉑陽（00566）向漢能發30億股獎勵股份，每股認購價0.1元，漢能帳面即賺5.4億元，原來係慷小股東之慨。亨得利（03389）將書寫工具品牌注入明豐（00860），股票作價由每股0.9元減到0.6元，並成為持股15%嘅大股東。中國置業（00736）折讓17.7%批股。趁個市一好番啲，呢類股份交易又開始活躍。

亞瑪遜出辣招搶客

綠城（03900）傳到退市，公司已經否認，之前亦否認畀銀監會調查，但外電有消息話銀監會已着手調查綠城同房地產信託嘅往來情況。「十‧一」係內地樓市嘅關鍵戰役，因為好多發展商降價狂推新盤，但買樓通常係愈貴愈搶住買、愈平愈冇人吼，如果樓市仍係冇起色嘅話，假期過後內房股就有難。

亞瑪遜件平板電腦賣到唔使200蚊美金，iPad今次卒之有對手，據用家意見，用kindle睇電子書不嬲好過iPad，新kindle fire有埋彩mon肯定更煞食。除咗iPad遇對手之外，聯想（00992）嘅樂Pad最平嗰部已減價到1,000蚊人仔，但面對亞瑪遜蝕本搶客，聯想暫時唔值得睇好。

古勝