近日股市陰晴不定，基金轉趨審慎，呢個時勢選股能力更為重要，除咗要有基本因素支持，亦要不大受歐美市況影響，先能突圍而出。
彩虹電子（00438）由過往的彩管業務過渡到新業務，現在主營業務為太陽能光伏玻璃、液晶玻璃基板、發光材料、顯示器件，以及呢堆產品嘅配件銷售。低碳經濟、節能減排以及可再生能源係未來發展大趨勢，而彩虹電子所經營嘅業務亦都算係比較正路。面臨改革期，由於傳統彩管業務快速萎縮，所以不斷開創新業務，早已喺咸陽、張家港、合肥等地建設廠房，預計今年下半年開始投產。公司集中發展太陽能光伏玻璃、液晶玻璃基板、發光材料等，都係現今電子商品嘅重要元件，銷路理應不成問題。
太陽能光伏玻璃，係新能源產業入面發展最快嘅產業之一，許多將來嘅電子產品或多或少都可能要以太陽能作輔助電源；鑑於現今螢幕講求薄身、耐用、解像度等元素，集團嘅TFT-LCD玻璃基板，只要打出品牌，亦會為公司殺出一條血路；集團嘅發光材料銷路極佳；至於PDP粉、鋰電池粉、LED粉等等，公司亦在繼續不斷推廣。
集團的太陽能光伏玻璃、發光材料等新業務快速發展，上半年營業額14.56億元人民幣，按年增13.6%，純利增4.42倍。公司今年下半年廠房陸續投產，呢幾年業績應可蒸蒸日上。繼續追蹤、出發。
香港大學電子金融服務榮譽助理教授徐燦傑