絲絲講場：渣打麥定思要跑數7.8億
渣打（02888）近年盈利年年創新高，佢哋為慈善都富有呢種進取精神。話說渣打自○三年參加咗「看得見的希望」，至今籌咗三千七百萬美元。渣打財務總監麥定思就設下目標，要喺二○年前籌夠一億美元（約七點八億港元），差唔多喺現今善款嘅三倍。
8.5萬員工宣揚護眼
個計劃主要幫亞洲、非洲及中東地區嘅可持續護眼服務籌款，麥定思就身兼計劃主席。數口精嘅佢就話，大家有能力消除八成嘅失明，但係全球仍然有三千九百萬人失明，所以渣打就作出今次一億美元嘅承諾，希望可以幫到多啲人重拾光明，改變佢吔同身邊人嘅生活。
除咗講錢，渣打員工都身體力行，全球已經有八點五萬名員工參加咗計劃協助籌款，仲不時利用工餘時間參與活動，宣揚護眼訊息。
香港作為渣打嘅重要市場之一，當然要跑番咁上下數，渣打香港就係同奧比斯合作，為中國復明行動同護眼教育籌款，短短八年間已經籌咗三千萬元，相信麥定思都應該收貨。
余絲韻