瑞銀鬧出魔童trader，未經授權交易事件，累到公司蝕咗23億美元。聽聞瑞銀好幾個至Top嘅賓卡，近日同班尊貴客戶去美國打golf，有人批評佢哋點解仲有興致去打高球，早兩日喺新加坡開董事會，又係為咗睇埋Formula One，查實大家有啲誤解。
公司已經話咗第三季業績可能要蝕錢，又成立咗專家小組檢討集團嘅風險管理有乜漏洞。鬧得佢哋最大聲嘅，當然係瑞銀嘅最大股東新加坡政府投資公司（GIC），前日瑞銀喺新加坡開會，就畀GIC批評到一戙都冇，管理層監管失誤。有股東都想行政總裁格呂貝爾（Oswald Gruebel）會畀股東逼落台。
據聞今次同班大客去美國加州度假勝地Pebble Beach打高球，都係想做吓補救工作，氹番班大客，以免第日冇生意做。呢個比賽係瑞銀同啲客嘅傳統私人活動，呢10年都係咁樣同班大客聯絡感情，冇理由為咗魔童事件就斷纜。
芝加哥大學商學院教授Steven Kaplan就力撐瑞銀，話繼續搞呢個比賽係利多於弊，如果個比賽係有用嘅，有冇事發生都應該搞，仲話呢個比賽可以幫到瑞銀安撫班客添！至於去新加坡開會，係為咗睇Formula One？消息人士話，純屬巧合，公司選擇喺新加坡開會嘅時候，仲未發生魔童事件，睇Formula One只係為咗娛樂班客，而唔係管理層。
余絲韻