城市電訊（01137）每年都會為全體員工搞兩次聚會，佢哋香港同廣州加埋有成3,200個員工，平日冇咩機會認識，就可以借呢個機會聯誼一下，亦都希望可以刺激一下員工嘅士氣。
佢哋啱啱就搞咗最新一次聚會，行政總裁楊主光當然有去主持大局，佢同絲絲講，員工不知玩得幾開心，佢嘅信念係「快樂嘅人才會帶來快樂嘅客戶」，加上員工過去幾年表現得咁好，一直都想搵個機會回報佢哋，所以今次聚會就帶咗一個驚喜畀員工，等佢哋開心吓。
係咩驚喜呢？咪就係請咗喺內地同香港都咁出名嘅歌手鄧紫棋（G.E.M.）喺聚會上面獻唱囉，仲唱足一粒鐘，楊生仲話，希望G.E.M.對音樂嘅堅持同熱誠，可以感染到啲員工，繼續為公司奮鬥。
最近城電申請免費電視牌照，楊生咁欣賞G.E.M.，唔知有冇興趣等拎到個牌照之後簽佢返嚟做合約歌手呢？
絲絲知道城市電訊有一個宏大驚險大膽嘅目標──到二○一六年，成為全港最大嘅IP供應商。楊生話，有效嘅內部溝通係不可或缺，咁城電應該再搞多啲員工活動，畀機會佢哋多啲溝通喇。
余絲韻