林奮強以前係知名地產分析員，依家埋頭苦幹趕paper，想幫香港抓緊「黃金五年」，佢趕工嘅地方，掛咗幅「狗咬耗子」嘅畫，原來係用嚟提醒自己唔好多管閒事。
呢幅畫掛喺佢公司嘅會議室，畫中嘅狗當自己係一隻貓，咬住一隻老鼠，林奮強見絲絲對呢幅畫咁有興趣，於是就「解吓畫」。佢話自己係屬鼠，吓？呢幅係乜嘢風水畫，居然用嚟鎮住自己？
佢解釋，「狗咬耗子（老鼠）」係北方嘅歇後語，即係「多管閒事」咁解，因為原本應該由貓捉老鼠嘛。而掛呢幅畫正係要提醒自己唔好多管閒事，因為佢作為分析員嘅風格，係鍾意用數據去講故事，有時分析數據得出嘅結論會好奇怪，更可能會令一部分人唔開心。
情況就好似二○○二年本港樓市畀「八萬五」政策打殘，佢認為樓價兩年升四成，當時真係冇人信，但幅畫就正正提醒佢要忠於數據和分析，唔好多管閒事。如果係咁，依家佢自資做五份有香港「黃金五年」研究報告，大力宣傳香港要把握依家五年的發展機遇，又算唔算係多管閒事呢？
講番幅畫，睇落好似好卡通，但其實係大有來頭，係由現年87歲嘅內地著名畫家兼詩人黃永玉所作。今年初喺佳士得春季拍賣會以98萬元售出，原來落入咗林奮強嘅手上，咁大家可以知道林奮強除咗識得分析，財政實力都有番咁上下雄厚啦。
余絲韻