市場熱線：洗倉未完再探底

期指收市低水80點，淡友仲未有平倉迹象，跌穿萬八之後，下一站好自然係望萬七，恒指跌到得8倍PE冇錯係好「抵」，但未係「底」，熊市估底好易表錯情。古勝尋日已話慎防聯儲局會議後樂極生悲，雖然今次阿伯照足劇本「買長沽短」，但估唔到道指尾市會插得咁狠，其實呢輪壞消息入貨、好消息出貨已係定律，奧巴馬同阿伯一宣布救市即插到七彩。

空軍睇穿阿伯底牌

港股尋日反應亦係意料之外，因為日韓台都唔算開得好低，但恒指低開500點後愈跌愈多，結果全日跌近5%，國指更大瀉6.3%，除咗印尼跌8%之外，其他亞洲魚缸都係跌2至3%之間，滬綜指則跌2.78%。祖國移動雖然扭轉強勢，但如非佢尾市由低位掃番高，跌幅收窄到2.7%，恒指跌幅可能已達4位數字。

阿伯畀人質疑佢救市力度不足，但佢亦巧婦難為無米之炊，息口已減到低無可低，惟有出口術話超低息維持多兩年。今次孖屐教埋佢買長債沽短債，實際已冇其他招數，最慘係畀空軍睇穿佢嘅底牌得隻2仔。歐洲亦都一樣，否則自視過高嘅佢哋唔使求中國幫手。

壓低長息主要目的係救樓市，但美國樓市自金融海嘯三年以來從未有起色，咁啱周三晚公布嘅二手樓銷售大幅好過預期，但睇埋樓價指數至講。而美債長息因為避險情緒高漲，唔使人為去壓都已好低，美國十年期債息跌到1.85%代表乜嘢？可以逼錢莊去借錢、逼人去投資？而靠筆養老金食息嘅嬰兒潮世代退休人士更大件事。

全世界都缺水，最嚴重當然係歐銀，畀你作為存戶都會驚。市傳祖國四大錢莊今個上半月罕見出現存款大減，較上月尾少咗4,200億人仔，股樓一池死水，唔通走咗去做民間大耳窿？依家全球金融市場亂七八糟，美匯指數升到78.51，人仔一年期遠期合約竟然預示貶值，港紙卒之跌穿7.8關口，之前資金會搵黃金做避風港，但近日金價都唔掂，又要唱番「現金是王」呢首長青金曲。

持盈保泰免嘥彈藥

當個市氣氛轉弱，一時間全部都係壞消息，資源稅改革油氣計價不計量，連煤炭同金屬股都驚定先；火電行業環保准入門檻提高，電企要畀多2,000億排污成本；加埋之前公布環保汽車門檻提高、家電下鄉逐步退出、風電場加強審批，連國策都幫手做淡。另外，又傳有內房A股爆煲，綠城（03900）同人和（01387）亦有不利傳言，人心虛怯之下更會將壞消息無限放大。

諗住會有黃金周沖喜吓，但零售股亦都係重災區，六福（00590）、英皇鐘錶（00887）同埋東表（00398）全跌一成以上，原本強勢嘅數碼通（00315）都大跌17.5%，依家唔可以再迷信強勢股，洗倉潮未完，一於持盈保泰為上！

古勝