滙豐新任女大班馮婉眉（Anita）上周一正式履新，大家可能對呢位滙豐一姐認識唔算太深，皆因Anita以前係「幕後英雌」，主力喺背後做環球銀行及資本市場（GBM）業務，甚少喺螢幕前出現。絲絲八到，原來Anita好鍾意做零售銀行和財富管理業務（RBWM），仲周不時以客戶身份試新嘢，等佢可以知道點樣改善銀行服務。Anita依家要睇零售銀行業務，你話佢幾咁開心呀！
滙豐文化係要員工全面啲，無論學歷幾高，都要識吓啲基本工作。Anita都做過Trainee，又做過分行經理，依家就變成大賓架（Banker）。佢好回味喺分行嘅經驗，特別係八十年代時期最窩心，無論係分行同事，又或者嚟分行嘅顧客，都畀到好warm嘅感覺，佢又試過做Teller（櫃枱服務員），睇到好多人生百態。唔好以為Anita淨係對打理分行咁「情有獨鍾」呀，查實佢好重視商業銀行業務。
以前佢好多時間喺「炒房」，但零售銀行應該點run，都難佢唔到。佢有一招好使得，依家新進banker應學吓。話說Anita鍾意自己走落分行試下最新服務，例如開設人民幣戶口、買賣投資產品，除咗更加掌握前線脈搏，睇吓銀行產品可以點樣改善，見客時又可以分享親身經驗，可謂一舉幾得。
無論做GBM亞太區主管，抑或香港區總裁，相信Anita都要面對旁人難以想像嘅工作壓力，Anita閒時鍾意踩單車同游水，時刻保持最Fit狀態，唔怪之得年約五十嘅Anita仲保養得咁好啦，素顏出鏡都非常見得人呀。
余絲韻