市場熱線：廣汽獲大行力撐

阿伯有乜救市符弗，閣下今朝將會知埋美股尾市嘅反應，但孖屐一邊逼佢出招，一邊預早批咗冇用，加埋道指之前7日升咗6日，的確令人擔心美股會樂極生悲，而港股更係一直跑輸成條街。不過，之前三個月都係月尾例挾，今個月仲係基金季結，令淡友唔敢放肆。

日日都食粥食飯睇3點鐘，古勝好懷疑歐資沽貨嘅說法，如果盤房通水歐股唔掂，又點會唔預早沽，要等到3點至做嘢？A股尋日升近3%算唔話得，只怪港股自己唔爭氣，水泥同煤炭A股勁升，例如兗煤A股升逾6%，但H股（01171）仍要跌。後市難玩在真中有假、假中有真，好似思捷（00330）前日回升、尋日再插逾一成，5折清貨已變成4折清貨，容乜易變3折、兩折。

後市睇實紅色電話

電訊股有疲態，祖國移動（00941）呢幾日都喺80蚊邊玩上玩落，中電信（00728）創新高之後冇再上，聯通（00762）更喺52周新高前窒步，但三隻股仍係沿住條上升軌，港股後市可以睇住呢3隻，一係突破高位再衝一段，一係就「雙頂」回落。香港蘋果店就快開張，電訊股會唔會破頂賀喜呢？但佢喺香港嘅影子股瑞聲（02018）就已連升3日。

尋日嘅強勢股有核電股、水泥股同電器股，後兩者係跌得多有反彈。而核電股係傳祖國出年會恢復審批新項目，所以中核（02302）、東氣（01072）同上氣（02727）都大升，但一瓣掂代表其他幾瓣唔掂，有消息話祖國加強規範風電場，風電股死多兩錢重，太陽能股除咗炒味濃嘅鉑陽（00566）之外繼續洗白白，幾種能源當然以又平又靚嘅核電秤先，搞再生能源都要先睇荷包。

市況唔得，小南國上市打退堂鼓，女股神劉央出錢又出力的三一重工，最後都落得押後上市收場。俗語話，勉強無幸福，咁差市況「夾硬」上市，最後公司同股東都無益處。唔信？不妨睇番今年54隻成功上市嘅新股，閣下估吓今時今日仲企響水面的有幾多隻？答案係得7隻！即係話有八成七未夠秤新股，唔夠一年已做晒潛水艇，部分「深海作業」嘅，好似泰凌醫藥（01011）及友川集團（01323），分別比招股價低71.5%及75.3%！

咁多年經驗，在下見過唔少公司，上市前被私募基金出錢出力催谷，再交保薦人化個靚妝安排上市。當然當中小部分能夠透過踏進資本市場跳板，擴展業務發揚光大，但較大部分係虛不受補，透支過度隨即走下坡。姑勿論如何，市旺仲可以玩票性質抽來開高即賣，反之市淡之時，新股是少買少錯。

古勝早兩日已介紹過東風（00489），話內地八月賣車銷量回升，所以對車股改觀。今日再介紹大落後嘅廣汽（02238），尋日創上市後新低7.25元後，倒升到7.62元收市。廣汽股價差只能怪中期成績表唔合格，賺少26%咁多，但同東風一樣係唔多唔少受到日本地震影響。

重視自主品牌發展

到下半年，各車廠都要靠新款車發圍，廣汽要靠新款雅閣、菲亞特等去搶佔市場，但公司最大心血係自己品牌「傳祺」卒之推出，國產車但中高端價錢可算係新挑戰，祖國一直鼓勵車廠推出自主品牌，唔使畀外國合資車廠控制。好似吉利汽車（00175）同比亞迪（01211）都只係靠價錢平，廣汽傳祺銷量如何，對集團今後發展好有意義。廣汽梗係賣花讚花香，傳祺以安全性測試攞高分做賣點，仲話推出反應好好。姑勿論係點，廣汽今年上半年最差時期已過，現價預測PE約8倍，摩通近日增持2%股權，見底回升博得過。

古勝