金融市場，絲絲服嘅人唔多，其中一個係有「中國女巴菲特」之稱嘅西京投資主席劉央，皆因佢份人夠豪氣，講得出做得到。
港交所（00388）資料顯示，西京投資先前將一堆三、四線股「清倉」，證實由劉央嘅全資公司接晒，一人孭起成個倉，果然夠晒霸氣！
劉央同絲絲講，係「西京投資管理公司嘅股權，成為劉央全資持有公司」，尋日港交所披露，劉央嘅西京投資（Atlantis Investment Management）清晒嘅十幾隻股份，全部轉到佢私人嘅Atlantis Capital Holdings持有，仲一口氣披露咗二十八隻，都係九月九日進行。
消息人士話，劉央當日分批向港交所申報上述變動，申報嘅文件多達百幾份，何其壯觀！
劉央話佢係逢低掃貨嘅先鋒，強調買咗貨後亦會用佢真名持有，唔會掩飾。
絲絲睇返呢批股份個價，好多都面目全非，女股神好明顯堅信自己嘅眼光，所以一己孭晒等大市翻生，呢股驚人嘅氣魄，真係得劉央至做得到。
余絲韻