市場熱線：逢高減持保留實力
港股中秋好「快落」，但當晚即有轉機，道指臨尾大逆轉，市傳意大利拍中國膊頭啃國債。依家德國想甩身，歐豬惟有攬住中國當水泡，鬼叫你有3.2萬億美金外匯儲備咩！唔搵你搵邊個？中國今次點都要做吓「人情」，隻「死豬」難啃都要啃，如果一啲都唔畀面，肯定引起新一輪恐慌，到時自己手持嘅歐債亦損手爛腳。意大利呢段時間放出呢單消息，一來可以為尋日拍賣國債造勢，二來向德國施加壓力，算係一石二鳥。
中國今時今日已好難做救世主，隨時亦自身難保，何況歐洲恩將仇報，限制中國產品入口。依家各國已冇乜「符弗」救市，所以不停出口術，「豬七」又話要救經濟，但其實大家都冇計仔，只係嗌吓口號算數，德國已為希臘退出歐元區做定準備。古勝認為希臘今個禮拜筆緊急貸款仍然可以過到骨，到時魚缸亦會以升市賀一賀，尋日歐股早段仲有得升，但跟住由升轉跌，大笨象（00005）喺英國亦跌到60蚊邊，要睇埋美股至知今日港股有冇得反彈，但反彈又如何？次次死貓彈之後繼續尋底。
本地魚缸買賣兩閒
中秋係全民被撳錢日，中台韓放中秋假休市，結果又搵香江做提款機，恒指暴跌超過800點，尾市險守萬九點，穿咗小型上升軌，成交得578億元，沽空又增至11%。依家孖屐買賣兩閒，過早心急撈貨者購買力消耗得八八九九，拿住現金者等更低位，成手蟹貨者又唔捨得沽貨，要鬥長命。
國企指數率先跌穿上月低位，連1萬點關口都穿埋，創兩年幾新低，過千隻股票下跌，近200隻股創52周新低，即係已跌穿上月低位，連最強嘅金飾鐘錶股亦頂唔順，水泥股連日洗白白，中建材（03323）跌逾11%。大行最叻翻臉無情，瑞信早兩個月先睇好中建材目標價到23.3元，依家又踩到佢只值9蚊，真係信佢一成雙目失明。
法蘭西三大錢莊已預告會被「木獨」降級，連祖國亦隨時被「毀譽」降級，以陰謀論，美債又成為最大得益者，十年期美債孳息跌穿兩厘。老美冇咗3條煙評級冇有怕，因為會搵埋其他國家陪葬。
A股尋日復市跌1%，滬綜指下站亦要再試2,437點低位，人行踢爆M2放緩原來係假數，八月祖國新貸款不跌反升，結果引起新一輪調控恐慌，祖國大把錢唔見得光，RRR加完又加，中小企借唔到錢，基建投資減慢，又話樓市一潭死水，究竟啲錢借咗去邊呢？
新丁招股難以看好
全球經濟嗌救命，但波羅的海指數繼續升到1,800點樓上，雖然話係旺季，祖國八月進出口仍超過兩成，不過有人話BDI挾升係鐵礦石出口商搞鬼，總之航運股就屢創新低。永利（01128）最波動，攞到路氹笪地起賭場，先升後插，收市跌幅收窄到4%，反映乜嘢消息都假，最緊要孖屐氣氛遷就。
女裝鞋鴻國（01028）開始招股，亂市都照上可算大膽，但睇見百麗（01880）呢排跌到咁樣，佢嘅招股反應可思過半。排住隊上市嘅新丁有9隻，有女裝鞋、男裝衫、亦可以飲吓茶，但咁嘅市況有一半成功上市已偷笑，3隻重磅股為三一重工、徐工同中信證券，後者靠股市搵食，今年成交一路縮，兼且睇「中信」呢個招牌，喺香港咁多間公司冇乜邊間上市時有益街坊。
古勝