絲絲講場：友邦年斥億元培訓
獅子銀行大刀闊斧精簡人手，喺市場仲擔心緊銀行業會唔會有裁員潮之際，本港保險業卻爭住請人，友邦香港及澳門首席執行官陳榮聲（Jacky）同絲絲講，計劃每年投資一億元，成立一個叫「AIA Premier Academy」嘅培訓計劃，尋日佢就為北角嘅培訓中心主持揭幕儀式。
上半年友邦嘅成績都唔錯，Jacky話都係拜團隊生產力提高所賜，所以今次大手筆搞個培訓計劃，希望培育更多新入行嘅員工，個計劃除咗一連串嘅培訓課程同講座之外，仲會對新入職者提供兩年嘅薪酬津貼。
一年一億元唔係細數目，所以Jacky對個計劃有好大期望，佢拍心口話，會同首席營業總監鄭國成盡量安排時間，親自同班新進員工分享心得。
請人重質不重量
Jacky更預告佢對新進員工嘅要求，就係要有熱誠同上進心。不過一講預測數字，Jacky就回復口密本色，點都唔肯講目標增聘幾多人，只係強調佢地重質不重量。
余絲韻