市場熱線：華新能估值唔算貴

上周五數據一出，華爾街三大指數應聲急挫2.2至2.6%，金價掉頭逼近1,900美元，十年美債息由2.13厘急跌至1.99厘樓下，買一個無AAA評級的國家債券，未來十年每年收2厘息都仲有人前仆後繼，大抵上可以睇到債券投資者對前景有幾咁悲觀。掉轉頭講，雖然美國政府期望透過不斷增加資金流動性來拯救經濟，但企業情願拿錢去買2厘息國債，都唔願意擴張生意、招請人手，估計伯南克假如真係研究及應付經濟大蕭條的權威，下一次的刺激經濟計劃，再單單針對市場流動性已經無作用，點樣恢復市場信心，令企業願意再投資方為正道。

港股恐又做提款機

呢幾日港股真係轉身要快，反彈到上周四朝早拿拿臨累升1,400點，但到今朝可能又較高位殺番過千點。古勝真係冇點你，提醒各位月尾例升，但亦係最後逃生機會，簡直係同過去兩個月同一個劇本。

睇美國經濟數據一時好、一時壞，懶神秘嘅救市措施若有若無，不如留意幾時「劏豬」好過，希臘財赤可能高過預期，意大利亦要取消滅赤計劃，所以話，債仔嘅說話幾時都信唔過。基本上，歐債已係末期肺癌，逐步會發展到互不信任階段，呢次真係有排捱。

講番上周五個市，恒指跌372點收報20,213點，成交縮到得717億元，沽空金額差不多一成。既然上周四已話完成反彈，跌亦理所當然，呢排港股日日做咗美股嘅跟尾狗，4連升之後又跟住斷纜，今晚美國放假唔開市，港股隨時變「提款機」。

思捷（00330）同國壽（02628）繼續「鬥衰」，但一個市場喺百病纏身嘅歐洲、一個喺祖國，古勝打句問句都會揀國壽。上周五國指成分股全軍覆沒，國指跌2.36%多過恒指，A股亦係好弱，其實自從收緊RRR之後都未好過，溫情總理仲執筆寫咗7,000字話唔會鬆綁。

同上月跌市唔同嘅係，今次係細股跑贏大股，升幅榜得大唐（00991）叫做係實力股，其餘都係蝦兵蟹將。但跌幅榜則星光熠熠，包括思捷、正通（01728）、中材（01893）、成渝（00107）、利豐（00494）等，今次洗倉潮係由細洗到大，真正恐慌仲未出現。

祖國缺電情況嚴重

今日仲想入市嘅可以留意太陽能股，光伏業「十二五」規劃話會大力發展太陽能發電，唔使靠晒歐洲，但未來5年祖國光伏發電量只及得上一個西班牙，吼大路嘅保利協鑫（03800），不如博較冷門嘅創益（02468），因為祖國聽講會打救薄膜電池，或提供較多補貼。

祖國電力股算係表現唔錯，皆因話南方5省供電全面告急，電企乘機又提出煤電聯動，煤電聯動已提過N次，但唔夠電亦係急需解決嘅問題，阿爺上次勉為其難批准工業用電加價後，今次較有可能嘅係重提住宅用電階級收費（即係用電愈多、電費愈高）。

風電股唔使理煤價，只係要睇電費，三大風電股上周五個別發展，華能新能源（00958）逆市升5.47%，但大唐新能源（01798）同龍源（00916）分別跌2.5%同5.3%。

講走勢，龍源之前連升9日先至回吐，其實係最強勢，大唐新能源平平無奇，華新能喺上月二十三日派半年成績表大賺多1.3倍，然後花旗讚佢係風電股「冧巴溫」，估值亦夠抵（預測PE約11倍），隻股連續爆上兩棍，跟住整咗支小旗形再突破，可能仍有餘未盡。

古勝