絲絲講場：Jack蘇「冧莊」TDC主席
政府尋日公布再委任蘇澤光（洋名Jack）做香港貿易發展局（TDC）主席，任期兩年。據絲絲所知，阿Jack今個月會好忙，皆因貿發局有一個歷來最大嘅英國推廣活動。
英國之旅多猛人撐埸
阿Jack已做咗貿發局主席四年，今次連任，一啲唔出奇。呢幾年全世界都話搞好展覽業，特別係香港鄰近嘅地區，你話競爭有幾咁激烈，稍有鬆懈好易墮後。
絲絲八到貿發局呢次推廣活動，除咗阿Jack外，仲有貿發局總裁林天福都會去，今次主題係「邁向亞洲 首選香港」，即係要宣揚香港作為發展亞洲市場嘅商貿平台。
據講，阿Jack嘅英國之旅，去嘅地方好多，倫敦一定唔少得，仲有愛丁堡、列斯、劍橋，仲會過埋瑞典斯德哥爾摩。絲絲最想參與喺倫敦搞嘅高層論壇，既然係宣傳香港嘅平台，最好就係搵啲用家現身說法，好似滙控（00005）、渣打（02888）用咗香港呢個平台咁多年，係最佳示範單位，所以滙控主席范智廉，同埋渣打香港行政總裁洪丕正都會出席。仲有一位絲絲好耐冇見嘅朋友——滙控前主席，依家係英國貿易及投資大臣嘅葛霖。
余絲韻