大家都知道阿里巴巴老細馬雲好鍾意搭飛機嗰陣寫信畀員工，而今次佢花咗兩個幾鐘寫嘅信，係畀加入阿里唔夠三年嘅新血。佢建議新同事喺頭三年要好好觀察、信任同思考，然後付諸行動，最後就應該同大家分享。
馬雲一開始就將聽到好多對80後同90後嘅不滿聲音講出嚟，佢話自己都年輕過，所以會理解。而今日後生仔女嘅態度，管理層都有部分責任，所以佢將阿里做嘢嘅方法同態度公開同大家講。
佢首先提醒新血，阿里永遠唔會承諾令人升官發財；入公司未夠一年就拎份阿里發展大計畀佢嘅，執定包袱走喇！
馬雲話員工入阿里未夠三年，即係好多嘢都仲未睇到，亦未諗到自己可以點樣為公司實現理想，所以最好「講少啲」，因為公司唔會睬你。新員工喺公司嘅頭三年要好好觀察，亦要信任公司，用個腦諗吓點樣做優秀員工。之後就要付諸行動，咁樣嘅經歷所講嘅觀點就要同大家分享嘞。新員工有乜反應就未知，但馬雲講明「聽唔聽係佢嘅自由」！
余絲韻