絲絲講場：人幣國際化龜速馬拉松？
人民幣未來條路就係要國際化，究竟依家發展速度係快定慢？原來市場有很大分歧。尋日喺一個論壇上，幾位嘉賓被問到呢個問題，以每小時120公里為上限，超過就為之超速，叫嘉賓講出現時人仔國際化嘅時速，大部分嘉賓答案都係70至100公里之間，但港交所（00388）行政總裁李小加話只有10公里！全場嘩然。
絲絲有車牌，知道每小時10公里係龜速，中銀香港副董事長和廣北揀100公里，財庫局局長陳家強就話係70公里，呢啲答案比較正常啲。點解李小加咁極端？佢解釋話，人幣國際化其實並非講求速度嘅快慢，過程係一場馬拉松，當中有好多挑戰。
人幣市場唔夠產品
佢話人民幣要做到國際化，必須在境外地區有人願意全面持有及使用，因此香港需要推出更多人民幣產品，透過債券、股票及其他產品集資，所得嘅人民幣可透過FDI等途徑回流內地，促進二次循環。依家市場唔夠產品，但好多人本住人幣升值呢個期望，即使冇產品投資，都願意持有。香港應該抓緊呢個機遇，大力發展，否則人民幣存款量分分鐘到頂後掉頭回落。
李小加今日將首次出席立法會財經事務委員會特別會議，講「黑客」入侵「披露易」網站引致多家公司停牌事件，小加以平常心看待，坦言並不擔心，只會說實話，絲絲就提佢千萬不要動氣呢！
余絲韻