恒指尋日繼續挾淡倉，扣除建行（00939）大手上板，大市實際成交都係六百多億元，魚缸人氣唔見得有多大改善。古晨喺恒指升上兩萬點樓上會盡量忍手，免接火棒。
尋日提及嘅御泰中彩（00555）表現勝於預期，以全日高位0.51元收市。此外，有圖有勢話嘗試反攻嘅濰柴動力（02338）走勢亦對辦，高開見36元後，一度飆過上38.9元，收升5.7%。
今日又再可以睇業績股，主要製銷輪式裝載機、挖掘機以及壓路機嘅中國龍工（03339），今年上半年純利增24.6%至11.54億元人民幣，只係中期派息稍遜，僅每股0.06元（港元‧下同）。
尋日龍工股價以全日高位3.05元收市，升7.02%，成交8,981萬元，主要成交集中喺2.99元或樓上。計落現價預測市盈率僅單位數字，反彈應可持續，主要阻力喺50日線3.6元，若再失守2.6元則並不尋常，要離場睇清楚有何隱憂。
古晨