市場熱線：雷士照明發光發亮

氣氛改善提防有詐

雖然仍有超過300隻股票下跌，但二三線股亦卒之有似樣反彈，古勝早個零禮拜已預告月尾好有機會反彈，孖屐氣氛突然改善，同六、七月尾幾類似，但亦可能係陷阱。九月睇落有生機，好耐未發市嘅新股今個月會有幾隻大嘢上市，喺聯儲局議息前可以憧憬阿伯會出新招，而九月亦係季結。恒指短期目標係二萬一點，但較難補番個下跌裂口21,725點，古勝唔係咁大興趣博嗰幾百點升幅，因為到十月可能係另一個新危機。

建行雖然連續兩日係威係勢，但收市升幅縮到得1.8%，其實內銀增加上繳RRR單嘢擺明係負面消息，滬綜指尋日由升轉跌連跌兩日，但港股仍當好消息炒，有挾高再沽之嫌。但美銀批建行甩手，點都係消除咗一項不明朗因素，發改委亦誓神劈願話地方債唔會爆煲，不知你信不信？

前日公布嘅本地零售數據係兩年來增長最大，亦好過孖屐預期，零售股又趁機炒起。咁啱美國隔晚又係炒七月消費者支出好過預期，主要係買車支出增加，呢樣又同油價下跌有關，但另方面通脹亦上升，所以數據唔算特別利好。

講到車，尋日車股都幾威，東風（00489）同華晨（01114）均升逾5%，做貨車嘅重汽（03808）同濰柴（02338）分別升8.87%同5.7%，做汽車代理嘅正通（01728）同大昌行（01828）分別升14.6%同4.3%。車股應該冇特別消息，只係PE低所以炒吓業績，但重汽嘅應收帳差唔多等於半年營業額。

兩隻同「超人」有關嘅炒股中聚電池（00729）同中國木業（00269）都勁升，呢個場面已好耐未見過，而超人啱啱增持嘅深中航（00161）亦升5.26%。不過，博士蛙（01698）同飛克（01998）仲未識止瀉，零售股要冒品牌興衰風險。

同民生相關嘅股上落冇咁大，雷士照明（02222）早一、兩個禮拜跟住個市下跌，但半年成績表賺多5成，並有著名嘅施耐德電氣以溢價入股，所以下跌空間同風險都有限，現價買入未必會發達，升到4蚊樓上可能會有壓力，頂多升到4.2元附近，但用上次低位3.23元做止蝕，計落仍有相當值博率。

需求穩定值較高PE

雷士派完成績表後，摩通將佢嘅目標價升到6.3元，即係距離現價有78%嘅上升空間，古勝冇咁大想頭，有4蚊樓上都會食胡。細摩話雷士有規模效應，即係大規模生產嘅成本較同業為低，尤其係依家稀土價格上漲，搞到好多細廠受唔住成本壓力而要停產，所以雷士值較高PE亦合理。

雷士嘅PE的確唔算低，今年預測PE約15倍，但勝在需求穩定，有自己品牌同OEM業務，而且做埋分銷商抽佣金，長線持有亦得。

古勝