孖妹缸湖遊：股海速食轉身要快

二三線股被洗倉唔係新聞，你以為藍籌股就冇死咩？錯！望吓跌到得近19蚊嘅國壽（02628）你就知。你話成績唔見得人抵死？但業績好嘅都一樣冇運行！孖妹呢排一齊失眠，有時夜晚忍唔住望吓道指走勢，就成晚唔安樂，驚第朝港股大冧，咁即係焗我哋短炒！短炒精髓係咩？就好似參加奧運嘅運動員一樣，心理質素要好，有咩唔對路要毫不留情走人。

杜：英皇證券集團研究部執行董事 杜冠雄

羅：康宏證券行政總裁 羅尚沛

祺祺： 你加入短炒行列咁多年有咩心得？點先係一隻啱「極速炒作」嘅股份呢？

　羅： 要睇股份嘅成交量，有時基本因素唔係最重要，有啲股份跌得太殘，就可以合埋眼唔理佢基本因素博反彈，不過當然要睇跌幾多及急跌原因，大藍籌可以跌20%， 二三線股可能挫40%。總之要快手快腳，否則就冇咗短炒意義。短炒嘅心理質素要好高，肯出肯入，唔可以對啲貨有眷戀，就算未到目標價都唔好坐，除咗止蝕仲要止賺。如果你唔驚美國又嚟一場「大龍鳳」，覺得有危就有機都要控制注碼，用開10萬元炒股嘅依家要減至2萬。

賺3至5%就離場

　杜： 短炒要睇市場風險及企業風險，仲要揀隻識郁、流通性大嘅股票，留意佢嘅基本因素及市盈率，當股份表現參差就要換股。講明「短炒」，賺3至5%就走人，到價一定要走，時刻保持資金充裕咁轉身先快。

港股受市場情緒支配，短期波幅喺19,000至20,500點上落，揀隻基本因素靚嘅股，當揸到咁上下，見指數去到20,500點都係乏力攀升就走人啦。

高妹： 咁又係，等等吓真係有排坐。

　羅：你仲要熟股價嘅上落模式，例如國壽喺20元至23元呢啲位徘徊，喺20元入貨，21.5元就好離場。恒指有機會重返20,300點，但第三季可能再跌穿19,000點。若股價回落20%，你覺得跌勢好勁，市場又消化咗短線因素，可以博反彈，不過你梗係要好熟企業消息啦。

祺祺：咁有咩股份係可以短線買賣呢？

　杜： 內銀股防守性強，與經濟息息相關，內地經濟增長仲有9.6%，經濟好景時多人借錢。好似建行（00939）呢啲得大約7倍PE，一周內或上試5.5元，而工行（01398）及交行（03328）目標價可以睇5.25元及6元，我最鍾意農行（01288），貪佢冇策略股東沽，上望4.2元。另外與經濟周期相關性低嘅行業好似電訊及保險股都可留意，中移（00941）點會賣唔到兼容其制式嘅iPhone手機呢？呢啲企業腳踏實地，3G業務亦可增加收入，股價可以睇82元，保險股唔會「大生大死」，傳鄭裕彤大手沽平保（02318），如屬實反映壞消息浮現，對股價有利，可望67元。

　羅： 「中投三寶」之一旭光高新材料（00067）行業前景亮麗，芒硝需求大，跌穿2元可買，反彈目標價2.1元，如果唔睇基本因素，都可以留意航運股博反彈。

高妹： 咁要避開啲咩股？

　杜： 概念股要避開！呢啲股份只喺大牛市先爆得上，屬於「只能曾經擁有」一類，長遠嚟講核電板塊比風電太陽能好。再生能源金風科技（02208）由高位跌8成已經冇得翻身，而保利協鑫（03800）靠歐洲出口，股價由5.72元跌到2.77元，當地經濟咁差邊有能力支持呀。另外，我對建材股都非常有戒心，當國企股PE得約9倍，股份一定要有完美前景先配30倍PE，呢啲股得個概念，前景好模糊。

　羅： 無嘢係一定安全，當藍籌股都被洗倉，金價單日跌成70美元，唔想瞓得唔好，要避就要避晒成個市。

基本因素其實唔差

祺祺： 縱橫金融界逾30年，拎住4個學位嘅你對經濟瞭如指掌，對股市又有咩高見？

　杜： 恒指基本因素唔差，依家經歷緊大調整，地方債務平台嘅風險被過分渲染，部分債務由中央擔保，其實唔使太擔心。而且，本港經濟根本就唔係同股市掛鈎，股市係同企業盈利掛鈎，喺美國兩黨爭拗前，美股經過27個月嘅牛市，全因生產成本降低咗，加上公司裁員後有利營運。港股則主要受資金流向同外圍因素影響，另外恒指好多成分股都係國企，幾乎100%盈利來自內地，所以走勢受內地經濟左右，部分本港上市嘅銀行增長達到30%，都係歐美企業做唔到嘅。

高妹：港股繼續跌嘅機會幾大？

　杜： 次輪量化寬鬆政策完結後，部分資金撤出東南亞，對沖基金亦開始減磅，依家連藍籌都拋售，強勢股可以話係跌市跌到尾。如果牛市繼續，今年港股低位唔可以持續低於去年低位，以股市7年一個周期嚟睇，如果今次過到關，會喺一四年先見頂，所以希望港股唔好連日跌穿19,000點啦。一旦歐盟解體而美經濟雙底衰退，恒指或下試14,000點，但機會應低過3成。

祺祺：不過依家市場恐慌，好多平貨都捱沽。

　杜： 如果覺得外向型股份被沽得太犀利，依家已喺周期谷底，可以睇利豐（00494）、思捷環球（00330）及滙控（00005），上升潛力好高，食大茶飯就係靠呢啲。

近日你有入市撈貨嗎？

今月港股驚濤駭浪，波幅顯著增加，幸而恒指本周初有喘穩迹象。近日你有入市撈貨嗎？據今期《東方日報》網上民調，截至上周末晚上六點嘅結果顯示，28.3%讀者已重錘入貨，9.6就動用住一半資金博反彈先，有20.1%人小注入市。另外，28.6%按兵不動，最後剩番嘅13.4%沽貨走人。

若有料報畀高妹同祺祺或有嘢問，可電郵money.biz@opg.com.hk

高妹、祺祺