市場熱線：中銀長線買得過

阿伯成日話預備咗好多招數去救經濟，其實佢可能有得揮，一味齋吹水「舢舨充炮艇」，但佢肯定係出口術高手，一句將下月聯儲局會議加多1日，就引發孖屐無窮幻想，到下月21日聯儲局會議前都有得借題發揮。

上個禮拜美國經濟數據愈墮落、魚缸愈快樂，GDP同消費信心唔好兼通脹上升，但數據差亦代表要救市，因此美股上個禮拜癲升4%，其他魚缸卻冇陪佢癲，港股一日升、一日跌，淨係睇上周五美股同ADR都已暈陀陀，如捕捉到跌市日買貨、升市日沽貨當然贏到笑，可惜多數股民都係別人貪婪時一齊貪婪、別人恐懼時佢更加恐懼。

股神出手贏掌聲

股神一出手買美銀優先股，即博得全場掌聲，一入股帳面就賺25%喎！如果美銀今個禮拜沽埋建行（00939）可能升值仲多。以佢老人家今日缸湖地位，連放個屁都特別香，第二個入股可能已被人鬧乘人之危。股神入股比亞迪（01211）之後升值10倍亦係一時佳話，但到今日只係得唔夠1倍利潤，如果當時金融海嘯期間佢睇中任何一隻車股，其實會賺多好多倍，例如華晨（01114）就升咗20倍。

不過，車股呢排亦被洗倉，東風（00489）上周五大跌超過6%，呢排好似逐個板塊輪流洗，得燃氣股係跌市奇葩，唔通博有得加價？好多股民驚冇QE3會冧市，所以上周五走定先，恒指跌169點。二三線洗完又洗，有825隻股票下跌、75隻創52周新低，連業績好嘅股都不能幸免，南航（01055）先升後跌，大光燈（00165）平收，中金再生（00773）由升10%縮到得1%，呢隻股上半年所賺已超過舊年全年，預測PE得4倍，唯一P:解釋係「好到你唔信」。

業績股當中，百麗（01880）升3.2%算係標青，壽頭（02628）連插3日，但ADR回升番2%，沽壓可能來自ELN同「I kill you later」嘅斬倉盤。強勢股得祖國移動（00941），但中銀香港（02388）有「克強送大禮」撐住，所以呢十日八日都復勇，炒消息係短線，但中銀嘅人仔概念係長線受惠，人仔將來個餅會愈做愈大，所以長線投資組合一定要預埋佢。

吸引力更勝恒生

其實買本地錢莊股無非係貪兩樣嘢：穩陣同收息，所以金錢龜（00011）長年都有批粉絲，但由今年開始應該用理性戰勝感情，中銀無論睇PE同息率加埋人仔前景，佢嘅吸引力明顯高過金錢龜，大摩亦話佢係本地錢莊股嘅首選。

睇埋中銀份半年成績表更有信心，雖然有28億元係雷曼迷債回撥，但亦稍稍高過孖屐預期。錢莊股係百業之母，歐美錢莊跌到一仆一碌，內地錢莊亦驚出年壞帳飆升，本地錢莊雖然一樣會受經濟環境影響生意，但作風一向穩陣，計落仍算係低風險長線投資對象。

古勝