娛樂圈有個專門搞笑嘅王祖藍，原來金融界入面都有一個，呢位被證券界行家封號嘅係前敦沛證券業務董事施俊威，佢仲啱啱過檔去天大控股（00455）做證券資產管理董事，仲係高薪跳槽添。
施俊威今個月啱啱轉新工，去咗天大搞基金同融資業務，佢話係被人高薪挖角，人工加幅跑贏通脹九條街！加咗超過三成人工。
講翻佢點解有呢個花名。官仔骨骨嘅施俊威講笑話，呢個稱號同佢嘅高度無關係，原來係因為近期冧市，好多股評人都唔願上電視講股票，間中都會甩底，咁施俊威嘅舊公司喺灣仔，去電視台上鏡做節目就好方便，所以一有人甩底就會搵佢頂上，出鏡率高咗好多，聽聞當年王祖藍未紅嘅時候都會幫人攝檔期，所以施俊威嘅稱號就係咁樣得番嚟，不過佢最後話想人哋叫佢做金融界林峯多啲。
余絲韻