絲絲講場：味千學精誓省招牌
最近一個月「豬骨湯」事件令到味千（00538）形象大插水，管理層尋日出席業績記者會嘅時候，趁機自動波咁再次逐點解釋番成件事，仲承認做得不足，以後會吸取教訓咁，同時話畀大家知會使多啲錢去成立公關部門、做多啲廣告宣傳去重整番個品牌。
發通告解釋「蟲咬人」
正當豬骨湯事件漸漸被淡化嘅時候，公司又再爆出上海餐廳有蟲咬傷人嘅事，認真禍不單行，唔知係咪受處理「豬骨湯」事件影響，誓要提高透明度，公司竟然發公司通告，解釋蟲咬人事件嘅處理方法——用2,000蚊解決件事。
味千主席潘慰知道大家會繼續咬住不放，所以用咗大部分時間解畫，反而個「靚仔」業績亦只係用咗十多分鐘就草草講完。佢話公司成立15年，第一次遇到咁大嘅危機，缺乏相關經驗去回應市場嘅質疑，搞到上海分店生意額大跌咗超過三成，雖然之後跌幅收窄咗少少，但對整體利潤必然存在一定影響，不過依家都未可以評估到事件嘅影響有幾長遠，只可以話根據同行相關經驗，3至5個月都不等。
經一事、長一智，潘慰話會透過加大廣告、促銷等渠道改善形象，仲成立一個公關部門去同外界溝通，希望盡快令品牌同生意重上軌道。
余絲韻