市場熱線：東方電氣估值合理

全世界睇住聽日嘅央行年會，依家孖屐好似逼阿伯唔推QE3唔得，歐美乜嘢招數已用盡，惟有當QE3係水泡，但QE3其實係漏氣水泡，推又死、唔推又死。美股隔晚已爆漿式上升，邏輯上有QE3會趁好消息出貨，冇QE3更唔知點收科。下周二就期指結算，本來輸家通常食尾胡，但今次睇唔出好友可扭轉乾坤。

國壽恐失守20元關

道指隔晚升超過300點，但亞洲魚缸開波已冇乜反應，而國壽（02628）前晚派完成績表後已知死硬，但港股只係輕微低開，一隻國壽嘅跌幅已拖累恒指唔見71點、國指唔見97點。國壽成績表低分已係預咗，但估唔到差成咁，呢隻不嬲係散戶愛股，尋日H股市值已唔見咗200億銀，窩輪更加全部變價外。前排網上討論區有人競猜國壽同思捷（00330）邊隻先跌穿20蚊，結果思捷跑出，但跌穿後回穩，國壽隨時遲來先上岸。

國壽A股只係跌3.3%，另一AH唔同步嘅股係比亞迪（01211），H股3日唔見近三成，但A股同期只係跌1%，A股溢價1倍幾，原來A股上市首年如果賺少五成，「保母」可能受罰。股神都有失手時候，老實講，佢老人家今年手風認真麻麻，佢睇好美國樓市同睇淡金價都要跌眼鏡。

國指跌超過3%，同恒指同係一陽一陰燭相當對稱，風電股係逆市奇葩，包括龍源（00916）、華新能（00958）等，但唔覺有國策變動，只係當技術反彈。業績後大跌嘅股多到數唔晒，中自化（00569）、通天酒業（00389）、華耐（01020）……雖然炒業績擺明係高難度動作，但美聯（01200）同第一視頻（00082）等竟然仲有人偷步炒業績，隨時偷雞唔到蝕揸米。

新增定單持續增長

近期成功炒業績嘅得電力設備股，但依家已經唔係核電概念，而係回歸到最污染又最平嘅火力發電。三份成績表當中，增長最高係東方電氣（01072），賺多53%至15.38億元（人仔‧下同），而且今年上半年新增定單236億元，多過舊年同期，其中44%係出口，「走出去」快人一步，難怪尋日可以逆市升6.26%。

三隻電力設備股預測PE係10至14倍，唔算高又唔算低，但勝在穩穩陣陣，依家祖國電力供不應求，未來定單肯定唔憂做。而核電雖然要「減速」，但當件事丟淡之後，相信又會再度擴張。呢類股今年上半年豐收嘅原因係原材料價格回落，東氣嘅毛利率提高接近3個百分點，另產量增加25.8%創新高。東氣嘅海外定單大增長，加埋內地嘅火電設備需求大，中短線有望繼續跑贏大市。

古勝