港股由前日憂慮萬九關不保，到尋日挑戰19,900點，市況變化急速，一個唔好彩兩日都企錯邊，隨時傷過單邊大跌市。
近期市況疲弱碰啱業績期，業績好唔好都要跌，不過尋日公布中期業績嘅中電信（00728）就例外，集團中期盈利撇除初裝費後有97億元人民幣，升10.2%，符合市場預期，股價收市升4.7%，收報4.6元。
近幾個月來，有關三大內地電訊商嘅消息，都圍住iPhone打轉，從種種迹象睇嚟，當稍後iPhone5推出時，三大電訊商將人人有份，但聯通（00762）因一早已經有，刺激自然冇咁大，而中移（00941），礙於TD制式關係，跟iPhone嘅「合拍度」仲有待觀察，相信都係以中電信嘅得益最大。
睇番中期業績，期內中電信嘅移動用戶達1.08億戶，較去年底淨增長19.7%，當中3G用戶增長更達75.3%，增長勢頭持續。股價近日於4.3元有形成雙底迹象，阻力位睇5元，一旦引入iPhone消息落實，可望帶來進一步的向上動力。
詩詩