絲絲講場：李思廉「思念」重返國指
大家都知道兒童係社會嘅未來，所以要內地政府對於當地樓市出招可以話係招招到肉，令到有不少內房股股價都跌到遍體鱗傷，而以廣州作根據地嘅富力地產（02777），前排好不幸地被剔出國指成分股，尋日富力董事長李思廉就好老實咁話，對於自己公司被剔走，佢個人都有啲唔開心，仲話自己都係睇報紙先知，希望第時做番好啲，可以入番去啦！
價太殘或考慮增持
絲絲睇番尋日富力嘅股價，以收市價九點○九元計，市值就得番大概九十二點二八億元左右，話晒佢哋賣樓嘅目標，一年都有成四百億啦，個市值好似不成對比。對於早排有基金減持富力股份，李思廉話，依家成個行業啲股價都跌到好殘，佢估依家啲投資者應該都唔會再喺呢個水平沽貨。睇番富力今年中期業績都算幾好，又有信心完成四百億售樓目標，會唔會考慮下增持股份，支持吓公司，李思廉就話，如果股價太低都可以諗吓！
余絲韻