絲絲講場：金融業「志同會」正名壯大
銀行業係一個好大嘅行業，業內有大大小小不同嘅組織，有一個叫「志同會」嘅，你聽過未？呢個會都係銀行界高層嘅身份象徵，好多會員都係頂頂有名嘅華資賓架（banker），佢哋將會修訂會章，正式易名為「香港金融業志同會」。
雖然「志同會」對大家嚟講比較陌生，但係絕對唔可以睇小，事關有資格入會嘅賓架至少都要總裁級，恒生（00011）副董事長兼行政總裁梁高美懿便是其中一位名譽會長。
賓架1975年發起成立
「志同會」係由一批志同道合嘅本港華人銀行界高層，於一九七五年發起成立，與內地、台灣、澳門、以及海外同業交流。
創始人之一、副會長兼秘書長吳連烽同絲絲講，憶起當年往事真係一番滋味在心頭。話說喺七五年時為文革期間，組團北上旅遊，由華東玩上北京，足足二十三日，其中有唔少賓架都係首次踏足祖國，佢最記得喺當時西湖只有佢哋一個旅行團到訪，與今時今日車水馬龍完全唔同。
吳連烽仲話，「志同會」組團到內地考察20次，除咗西藏、青海、寧夏，其他內地省市自治區都幾乎留下足迹。以前「志同會」只接受賓架做會員，吳連烽話，依家都會接納金融界人士申請。
余絲韻