槓桿原理好多人都識，恒地（00012）主席李兆基（四叔）都活用此道，四叔自爆，話佢做慈善都會用槓桿原理，即係將有限資源去幫助最多嘅人，可見大商家雖然大把錢，亦講求善用資源。
四叔過往做善事不勝枚舉，但絲絲印象較深嘅係佢喺內地推動嘅「溫暖工程」同埋「百萬農民工培訓」計劃，當中涉及受惠農民工達到120萬，可見四叔深明授人以魚，不如授人以漁，令受惠者終身受用，憑學得嘅一技之長求生。
四叔做善事之心，原來係喺讀書時受到老師啟發，老師教佢要多些幫助受苦市民，以及幫助其他有需要嘅人士，佢後來利用商業成功之道，藉槓桿原理嘅手法惠及社群，四叔嘅慈善之道主要有4點，排頭位就係槓桿，另一點好重要嘅，就係唔好以為有錢就萬能，捐錢之餘亦要捐時間同埋要參與。
至於另一位亦經常做善事嘅商界名人，就係恒隆地產（00101）董事長陳啟宗，而佢行慈善之心則承繼自其父親，他父親將其一套價值觀傳至下一代，並希望下一代能繼承這傳統。
瑞銀－INSEAD亞洲家族慈善事業嘅研究顯示，就好詳細訪問四叔同埋陳啟宗嘅慈善之路，除咗香港富豪之外，亞洲各地嘅富豪都好有善心，仲希望將慈善延續至核心家族價值。不過，年輕嘅第二代慈善家則採取「活到老捐到老」嘅做法，並愈來愈對藝術與環境，及全球思維領域方面嘅慈善事業感興趣。
余絲韻