市場熱線：國美部署中線收集

不過，呢排大跌市已嚇親街坊，而且好多次都係高開低收，所以尋日夠膽入貨嘅股民唔多，總成交金額亦得746億元，坊間全面睇淡亦係挾上原因之一。大隻佬最威係「貓貓狗狗」（01199）同中石化（00386），都係啲PE平嘅股，相反百麗（01880）同恒安（01044）呢類貴價股就冇運行，呢排揀股應該用PE做標準。

內銀股已夠晒平

建行（00939）仲有幾日美銀批貨就會解封，所以尋日亦升唔起，內銀表現最好係聽日派成績表嘅農行（01288）。其實美銀月尾沽貨之後，內銀已無後顧之憂，依家預測PE平到你唔信，好似民行（01988）得5倍幾。當然，到年尾又會話驚地方債爆煲，但要短線博反彈，內銀亦係唔錯嘅選擇。

呢幾日暴跌嘅太陽能股、金飾鐘錶股、水泥股全部報復性反彈，但輪到食品股被洗倉，唔通真係輪流洗劫？康師傅（00322）上個禮拜仲日日創新高，點知中期僅賺多16%，同股價升幅唔成正比，PE又高，跌得合情合理。不過，食品股始終係避險選擇，投資組合可以趁低買啲食品股平衡吓風險。

近日有賞有罰，業績好嘅361度（01361）、哈電（01133）、鐵貨（01029）同百盛（03368）都升得幾靚。放榜期遇着市況差時見光死，但當氣氛轉好嘅時候就唔同講法，呢兩日嘅業績股可以吼吓經緯紡機（00350）、光大國際（00257）同信利（00732）等。

國美電器（00493）下周一派中期成績表，首季業績已好到你唔信，其實捉心理，隻股一定唔衰得，因為經過一輪權力鬥爭，管理層執過位重新起莊，如果盤生意搞得差過陳曉年代，黃光裕顏面何存？

祖國減稅利消費

國美賣電器，照計同樓市息息相關，二三線城市月尾前傳會出限購令名單，但未來幾年有3,600萬套保障房供應，正負面因素可以互相抵銷。而下個月中央開始減稅，消費股最值得留意，賣電器好過賣衫賣鞋，因為城市連鎖店來來去去都係得國美同蘇寧爭。

另外，舊年黃陳要喺股東會拗手瓜，有關人士應該喺孖屐度買入唔少股票，所以國美股價硬淨自然有其因由，上周一更創咗3.84元嘅三年新高，昨日收報3.31元，相比其他二三線洗倉股已算奇葩。強勢股如果業績唔對辦，隨時可以仆到直，但國美首季賺多66%令人跌眼鏡，如果繼續有咁高嘅增長，隻股仍係買得過，最多分注中線吸納就最穩陣。

古勝