做得上市公司，梗係要同股東交代經營成績，面對虧損或者盈利縮水，聽得最多嘅理由不外乎係原材料同人工上漲、需求疲弱，甚至加息。但大陸嘅A股，仲可以賴政府支持唔夠，甚至有公司係睇天食飯，「今年賺少咗係因為冬天唔凍、夏天唔熱」。
內地有唔少公司賺到幾多，就要睇吓政府畀幾多補貼。厚面皮嘅，就直接將利潤下降賴政府補助減少；仲要面嘅，就話「營業以外收入減少所致」。
有啲公司明明蝕咗錢，仲大講特講經營形勢點樣「一片大好」，於是「加大咗生產力度」而導致虧損；有啲公司盈利下滑，仲話自己「完成咗上半年嘅經營目標」。
公用股本來好穩陣，但A股嘅情況就夠晒特別。有問水電企業解釋點解賺少咗，係因為「降雨量不足」；熱電公司就話「冬天唔凍，夏天唔熱」。又有啲公司蝕多咗，就話「設備年度大修」，理由同去年一樣嘅？唔通年年都要大修，咁仲點賺錢呀？
有間公司上半年慘賠6,500幾萬人仔，話係節日促銷造成，即係賣唔出要蝕，賣得出蝕得仲多。所以話揀股真係要攞放大鏡望真啲。
余絲韻