絲絲講場：利記陳婉珊極地練意志
尋日絲絲咁啱約利記（00637）靚女CEO陳婉珊食飯，天南地北傾完一輪，先知原來阿Clara（陳之洋名）係一名「極地旅行愛好者」。不過，佢反而一啲都唔覺自己作為女仔去「極地行」唔方便，反而更覺得可以幫到公司盤生意添。
咪睇陳婉珊外表斯斯文文，其實她極愛「高難度旅行」。一般人行山去行大帽山，佢就去四川三千幾米高度「行山」。作為仁愛堂總理嘅佢，又曾經試過帶仁愛堂一班中學生，展開十八天南極之旅，見過三十幾呎嘅巨浪、又試過凍到唔知個鼻去咗邊。但佢深信，呢種經歷過鍛煉嘅意志力，係管理人員有需要具備。
沙漠差啲蕩失路
仲有一次，利記早前曾經嘗試拓展上游業務，作為CEO嘅佢當然就要去睇礦。嗰次佢要去戈壁沙漠睇一個金礦，仲請咗一個當地人做嚮導，點知沙漠比起女人心更變幻莫測，最終甚至連當地導遊都差啲迷路，惟有放棄咗。但Clara仍然好積極，話最起碼證明咗自己唔討厭周圍去睇礦吖。絲絲真係服咗呢位「極地迷」CEO！
余絲韻