市場熱線：勤做功課發掘好股

如果諗住沽期指為手上二三線股做對沖就大鑊，變咗左一巴、右一巴，其實尋日恒指算相當硬淨，就算最衰之時，大隻佬仍有近10隻上升，到收市藍籌更係升多過跌。祖國移動（00941）七月份3G上客放緩，但仍做咗火車頭托住個市，全日升2.9%，另三隻公用股、兩隻石化股、長實（00001）同大笨象（00005）亦心口鑲鋼板，兩隻出口股思捷（00330）同利豐（00494）都係逆市奇葩。

尋日整個亞洲市場大冧檔，主要同周末幾間大行嘅策略師，不約而同釋放負能量有關，佢哋建議投資者對今個星期五伯南克Jackson Hole會議，唔好抱太大期望，認為QE3出台機會渺茫，美銀美林更估嚟緊一年美國衰退機會升至四成。

二三線股仲未「洗」完

其實唔使大行賓架出報告，都知賭QE3出台注定九死一生，雖然被標準普爾剔除AAA債務評級，但美國十年期債息繼續屢創新低，上星期去到2.11厘，大家不期然會諗，聯儲局即使入市買債，債息又可再跌幾多？與其倒錢落海，不如留番彈藥進行其他更具創意措施好過。既然市場家陣欠嘅係信心唔係鈔票，阿伯不如學白頭任年代嘅金管局咁，入市買股票恢復市場信心，甚至購入遭當地銀行收回強制拍賣的「吉屋」，減低空置率，肯定會比推QE3有更大振奮作用。

大戶一方面托住藍色大隻佬，另方面幫二三線股洗到立立令，究竟想點？藍籌總成交319億元，佔總成交884億元當中嘅36%，連續三日沽空金額超過一成。基金散貨通常先沽期指，大市下跌導致二三線恐慌，但今次係二三線股先行股災，唔少股由上周四起三日唔見咗三成。

尋日美股期指亦係咁波動，跌升跌升十足坐升降機，其實美股期指參考性好低。孖屐已講定阿伯禮拜五開金口或者提QE3，依家孖屐見到任何嘢都攬住當水泡，但阿伯出吓口術好過真係出招，等投資者有個美麗幻想好過，而且美國嘅通脹亦殺到埋身，想放水唔係咁易。

期指收市高水5點，個市陰陽怪氣，博反彈好似賭大細，但六、七月嘅跌市都係到月尾有例牌反彈，今次八月跌得咁急，反彈更加唔出奇，到時可能係最後逃生機會。二三線大洗倉後元氣大傷，超賣股有機會反彈幾個巴仙，尋日龍源（00916）、鞍鋼（00347）同興達（01899）都屬於呢類，但小心贏粒糖輸間廠。

強勢板塊表現逆轉

放榜股亦係瓜多過菜，唐宮（01181）、聯塑（02128）同賽得利（01768）等半新股咁快就業績唔對辦，證明近年上市嘅新股質素多數係籮底橙。但部分成績表靚嘅股仍可做逆市奇葩，如深中航（00161）、哈電（01133）、百盛（03368），不過博得中都係賺雞碎咁多，博唔中就嘔血。

水泥股、鐘錶珠寶股、濠賭股同埋太陽能股全部「冧莊」，即係插完再插，由強勢變弱勢嘅另一例子係聽日派成績表嘅華晨（01114），祖國傳媒有段報道題為「寶馬等外資車企面收權 合資公司淪為代工廠」可以一讀，冇技術就冇話事權，好多外資車廠連代理權都收返番嚟自己搞，依家得「掃把佬」同埋賓利係冇成立中國銷售公司。大昌行（01828）係靠賣賓利，今年都賺到笑，但亦唔可以太老定。

祖國品牌唯一喺外國闖出名堂嘅得聯想（00992），尋日古勝亦有點題話隻股其實有得諗，聯想尋日升近4%，呢排可以留意HP賣個人電腦業務花落誰家？市況大上大落，無謂勉強，一於勤做功課發掘好股。

古勝