孖妹缸湖遊：港股見底抑或尋底？

講真吖，要知道港股係咪已經見底，方法都有唔少，其中一個就係以「黃金比率」去揣測恒指嘅反彈阻力位及下跌支持位，不過呢個方法有時啱有時錯，散戶唔好信到十足十，當係參考好喇！

不過，現時市場上有好多人都話恒指仲未見底，當中以將跌穿17,000點嘅說法有最多「粉絲」支持。究竟現時港股係見底抑或尋底？散戶會唔會撈底變摸底？嘩！呢啲問題唔簡單喎，我哋都係請教財金專家啦！

董：眾利股票公司主席董偉

撈貨要睇投資價值

祺祺： 你今年已經82歲，見證過港股唔少風風雨雨，依你高見，究竟恒指見底未呢？

　董： 恒指見底未？呢個問題係會變嘅，主要視乎未來歐美經濟政策變化以及資金流向！由於環球市況仲係唔明朗，本月港股走勢依然會反反覆覆，之前跌得咁傷，主因係投資者嘅恐慌情緒太過嚴重，搞到人人都沽空沽貨。我做咗呢行咁耐，都未見過恒指PE（市盈率）只有8、9倍咁低，依家好多優質藍籌股股價都跌過龍，所以早前我喺18,000至19,000點附近都入咗啲貨！　

高妹： 縱橫股壇咁多年，你都仲穩如泰山，當中一定有唔少撈底經驗及心得，不如分享吓！

　董： 撈底嘅宗旨唔係睇恒指跌到幾多點，而係睇「機會」及「投資價值」。我覺得大家喺20,000點以下撈貨已經安全，但如果你係長線投資者，自問心理質素又唔差，咁你喺20,000點以上撈貨都冇問題！總之大家買股票唔好聽市場上嘅流言，亦唔好睇大市走勢，最重要係睇一隻股票嘅前景仲有冇投資價值存在。不過，我就唔建議散戶借錢買股票，買貨亦唔好全部資金瞓身，要留番些少現金。

年底前重上二萬二

祺祺： 撈底真係要睇你心口有冇個「勇」字，唔知你有冇撈底好介紹呢？

　董： 依我經驗，喺大跌市之中買入藍籌股，最後都係可以股價、股息齊賺！現時我比較鍾意地產股，好似長實（00001）、恒地（00012）及新地（00016），呢啲優質股股價已跌得太多，好值得大家買入作中長線投資。另外，投資要睇前景，所以我都睇好內銀股走勢。

高妹： 身為證券界老前輩，我知你喺上周都有與中央領導人見過面，你點睇佢送嘅禮物呀？

　董： 今次佢嘅言行證明咗中央政府好重視香港嘅金融及經濟發展，當中各項優惠政策幫助各行各業，對市場嚟講係好消息。由於香港係國際金融中心，投資買賣十分自由，所以吸引咗好多對沖基金駐港「搵食」，難免令港股有時好波動，不過本港經濟唔算差，好多大企業都有盈利又有派息，散戶投資時睇番基本因素最客觀，唔好畀市場放大咗嘅壞消息影響投資情緒，我覺得喺今年底前恒指上番22,000至23,000點，絕對係合理水平。

黃：靈獅控股行政總裁黃偉康

未來兩月下試萬七

高妹： 股市有牛、熊之分，散戶亦分好友、淡友，你成日畀散戶叫做「大淡友」，咁你睇港股係咪未見底？

　黃： 根據過去咁多年來嘅大跌市，好似九七金融風暴、○○年科網股爆破、○三年沙士肆虐危機及○八年金融海嘯，股市都唔會跌一下就見底，通常大跌之後就會有2至3日反彈，呢個跌吓又彈吓嘅過程會維持一陣子，所以我相信恒指仲未見底，九月及十月最有機會跌穿17,000點或以下。

祺祺： 點解九月及十月最有機會見底？

　黃： 大家以為美國經濟係眼前最大問題，經常質疑美元地位，但其實市場上有好多人喺度買緊美債，而且中國及日本亦唔會拋售，所以美國被降主權評級根本唔算大事，因為美債根本冇乜跌過，而且我相信QE3（第三輪量化寬鬆）一定會出現，不過現階段美國唔會有乜嘢救市措施落實，因為兩黨仲未有救市共識，財政大臣亦只會出口術撐住美股，加上仲有歐債危機未解決，所以未來兩月仲有唔少變數存在，港股短期波動較大，有可能下試17,000點低位。

逆市撈底小賺即沽

高妹： 講到歐債危機，其實都幾麻煩，係隨時拖累港股嘅外圍因素。

　黃： 歐債危機係講緊一個國家隨時要破產，當中嘅後遺症會禍延其他國家。依家法國及德國又唔肯發行歐元區債券，令歐債危機隨時爆煲，而且早前法國第二大銀行法興又被傳財困，可見歐洲亦問題多多，如果有壞消息一出，到時港股亦會受到拖累，所以我估恒指仲未見底。

祺祺： 依你意見，港股要十一月先有轉機，散戶要等到嗰時先可撈底？

　黃： 股票有時係「跌得甘，升得冧」，撈錯底真係要即刻做止蝕。有時當人人都以為嗰個已經係底，點知原來跟住再落去仲有地板、地牢甚至地獄，咁就真係唔知幾時先可以上番天堂喇！不過，只要散戶有晒心理準備，依家入市撈底炒短線波幅都有水位，但係就要快手囉，賺少少好沽貨喇！

37%股友認購人幣國債

財政部在港發行新一批人民幣國債，市民可於上周四起認購，你會認購嗎？據今期《東方產經》網上民調截至上周末晚上6時嘅結果顯示，37%人話會認購，63%就話唔會認購。

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk