市場熱線：暫避風頭謀定後動

上個禮拜先係周一疑似熊市反彈，跟住有「克強送大禮」，應該引到唔少人入貨，但散戶入貨就大戶沽貨，上周五沽空金額高達106億元，佔大市總成交13%，連續兩日都超過11%，魚缸咁低迷空軍都咁狼死，何況家吓借貨息率成本唔低，依家太多對沖基金興波作浪，但歐洲禁止沽空金融股亦係冇符。為咗有間歐洲錢莊撲水5億美元，結果全球魚缸蒸發咗幾萬億，令人想起○八年為咗幾百億美元唔救雷曼，結果搞到全世界要注資幾十萬億美元。

熊市反彈引人落疊

恒指上周五收報19,399點，同八月九日嘅收市價只差幾十點，而差150點就較高位跌兩成，技術上踏入熊市，但恒指已超過三個月未上番250日平均線，加埋熊市大上大落嘅特性，古勝一早已當係熊市，只不過有時熊市反彈足以引人落疊，亦有一班死「牛」一邊頸嘅人，將購買力逐步消耗。國企指數已率先穿底，二三線股更加直情係股災，牛或熊嘅爭議完全冇意義。水泥股、太陽能股、金飾珠寶股同濠賭股統統打柴，呢幾類全部係昔日強勢股，但覆巢之下豈有完卵？簡直乜股都死。

日yen升到76，又話日本央行會出手干預，古勝對外匯只識皮毛，但次次干預親都跌完再創新高，如果一見干預就買yen好似容易賺過買股票。鄰近泡菜國上個禮拜取代咗港股嘅地位，成為股市放大器，上周五暴跌6.2%，而A股跌唔夠1%算係最少，呢排成日傳阿爺將會加息，古勝就唔多信？呢排市況阿爺會做傻事。

惠普唔玩PC市場，聯想集團（00992）會唔會有着數呢？抑或聯想買埋惠普PC業務呢？唔怕大市氣氛唔就嘅話，其實可以諗吓聯想，中期成績表靚爆鏡，但股價都仲要插水，iPad雖然大行其道，不過聯想嘅增長冇減慢過，何況你有iPad我都有樂Pad？

講到業績靚，中旅（00308）同創科（00669）夠唔錯啦，但一樣被洗白白，依家基金要錢唔要貨，連領匯（00823）都被Capital減持。依家隻隻股業績後都見光死，反而大隻佬嘅祖國移動（00941）同中信泰富（00267）業績後有得升，祖國移動好似有大把理由解釋：變咗公用股、PE低、息率超過4厘、又有「哎瘋」憧憬，但亦令人懷疑係咪大戶托住祖國移動去沽貨。

中外運勝在茄薯多

仲有一隻唔使見光死嘅係中國外運（00598），可以逆市上升認真巴閉，PE低兼拎住50幾億人仔現金係佢最大賣點，另外阿爺話加大力度支持物流業亦有幫助，上周五因為呢單消息，隻四川成渝A股漲停板，乜唔係話要減路費去支持物流業嘅咩？

雖然個市氣氛差兼見光死，但有好多股份成績表值得表揚，例如首都機場（00694）同長汽（02333）等，後者發盈喜時話賺多80%結果賺多109%，而首機更係增長1.6倍，但收入只不過增長13.3%，靠慳皮可以有咁嘅成績應記一功。

古勝