對於散戶來講，每年呢個時候，都希望上市公司喺出業績嘅時候慷慨「送禮」。唔少股份公布派息理想，如特步（01368）及勝獅（00716）等，而消息一公布，股價顯著上升，價息齊賺！
早前財險（02328）盈利按年升96.87%，並四年以來首次恢復派息，中期息每股22.5分（人民幣‧ 下同）。財險恢復派息有驚喜，派息比率又高於同業。正如我所講，投資股票係投資喺佢哋資產增值同派息率，有得派當然開心，但係穩定性同樣重要，唔派息之後留現金又有無實際發展方向，都係大家要考慮嘅一環。
增加派息又係咪萬試萬靈？好似和黃（00013）近十一年來首次增派中期息，不過由於業績遜預期，加上一早就預咗，派息未必能穩定散戶嘅心。至於另一批股份，就係派息失望嘅股份，好似內地百貨股茂業（00848）中期純利3.01億元，升5.17%，都算有錢賺。不過，由於茂業出乎意料地唔派中期息，令股價周二急挫逾8%。茂業董事長兼首席執行官黃茂如解釋，係希望留資金作擴展之用，無資金壓力。
基金大戶如果以派高息來揸股份，而股份唔能夠幫佢哋「達標」兼攞獎金，唔掟貨至奇。所以投資基本面係「非常重要」，加番少少逆向思維，可能會更有驚喜！
香港大學電子金融服務榮譽助理教授 徐燦傑