即使祖國再度送禮，但對勢弱嘅港股，未能帶來支持作用，恒指尋日一度跌穿20,000點水平，但後市仍難言樂觀。咁嘅環境之下，選股方面亦都應該偏向穩陣為主。
新創建（00659）業務一直頗為多元化，遍及交通、物流、基建等等，從負面角度睇係業務唔得集中，難以惹起芬佬嘅興趣，不過好處就係分散風險，皆因就算環境幾曳，總有一兩項業務有表現，故歷年業績及派息表現均相當平穩。
不過，集團近期發展亦轉趨積極，繼分拆從事鐵礦石業務嘅新礦資源（01231）上市後，集團上周再宣布，以3.5億元作價，將旗下新渡輪業務全數售予信德（00242），管理層表示，未來會進一步以道路及水務等作為核心業務。
踏入八月，新創建股價呈V形走勢，最低跌至9.5元，但之後迅速回升，昨日收報11.5元，重返月初水平，但市盈率不足9倍，而股息率就有5.5%，在後市欠明朗之際，不失為收息之選。
詩詩