絲絲講場：阿里30億借畀夥計買樓
通脹飛升、樓價高企，中港兩地嘅打工仔都齊齊面對置業困難嘅問題，阿里巴巴集團就睇中呢點，大手筆拎出30億元（人民幣‧下同），為員工設立免息嘅置業貸款計劃，令員工可以快啲擁有自己嘅小天地，就連計劃名稱都貼心過人，叫做「iHome」。
免息貸款限首置
只要喺阿里工作夠兩年，就符合資格申請，資歷2至3年嘅員工，最多可以獲20萬元嘅免息貸款，3年或以上更高達30萬元。喺內地借30萬元商業貸款，分20年攤還去計，利息支出高達17萬至20萬元，數數手指，阿里員工向公司借免息貸款，慳慳埋埋啲利息，都差唔多等於本金。
呢個計劃雖然幾好，但就只限於首次置業，以及只可以喺工作當地買物業嘅員工先可以申請，有員工就擔心，萬一要跳槽就會受到呢個計劃綁住，仲話不如公司將啲錢直接派發好過。照咁睇，主席馬雲要留住人才可能要再諗多啲其他計仔喎！
余絲韻