早排股市暴升暴跌，絲絲好想聽吓「四叔」（恒基地產（00012）主席李兆基）有乜意見，尋日終於等到恒地公關畀咗份四叔嘅訪談資料，原來佢老人家睇好中港經濟，話恒指明年會見3萬點！佢又重申承諾，若恒指見3萬點就每年捐10億元做慈善，見4萬點捐雙倍。
不過四叔好感慨咁話，金融海嘯對佢好大打擊，原本只係為咗分享心得，有錢大家賺，「覺得好唔甘心，人哋叫我做『股神』，我依家話千祈唔好，你唔好信」，因為佢怕股民跟佢買而蝕錢。
四叔又重申佢兩位公子李家傑及李家誠係王國繼承人，Peter（李家傑洋名）就首評自己有個千億老竇嘅感覺，佢話就係「爽」！意思係「父親畀佢哋好多精神財富」。
提到Peter畀四叔嘅3個男孫，四叔話對3個BB嘅性格已經好清楚，至於細仔家誠與千億新抱新添嘅男孫，就「個鼻似爸爸，又似我！」對於乖孫們嘅將來，四叔話「當然希望佢哋做大富翁！爺爺畀咗佢，佢已經係富翁。如果佢更出色，青出於藍就更好，做特別大嘅大富翁，大大富翁，再高一級嘅富翁！」
四叔仲提到自己財產安排：「香港好多富豪，後代好多都爭爭吵吵。惟有你自己公道啲、安排得好啲，希望唔會發生呢啲問題，我應該有個公公平平、合理清楚嘅安排。」但四叔強調冇諗過退休：「有時打麻雀唔係為咗賭錢，係為咗興趣，食咗胡會覺得好開心。我冇諗過退休，我嗰輩嘅人多數訓練到唔會停落嚟，人在江湖身不由己。」
余絲韻