市場熱線：領匯高息防守強

歐洲魚缸早段跌到七彩，原因係有間歐洲金融機構要問歐洲央行借5億美金，引起孖屐恐慌，呢件事應該係上個禮拜傳出法蘭西錢莊出事嘅後遺症，執筆時德股狂跌3.5%，連帶道指期貨亦大跌。呢次環球魚缸可能已完成反彈，比預期中更短癮。

證券股升勢好短癮

恒指收報20,016點，如非港交所（00388）勁升早就撐唔住，話得說回頭，港交所同深滬成立合資公司，主要係編製新指數，大家其實仲係競爭對手，有乜協同效益值得懷疑。港交所升勢恐防曇花一現，好以早兩日借消息炒電訊股同證券股都係好短癮，尋日申銀（00218）同第一上海（00227）孖寶高開一成後打回原形，其他證券股均要倒跌。富士康（02038）周二嘅升幅已接近全部蒸發，瑞聲科技（02018）更輸凸，呢排應該要見好即收。

尋日六福（00590）同周生生（00116）均創新高後倒跌，而傳聞中嘅二三線城市限購令名單公布前夕，內房股同水泥股嚇到腳軟，水泥股連插兩日。舊年以來表現最差嘅航運股反而係呢排嘅強勢股，波羅的海指數反彈上接近1,400點，但航運股同經濟形勢關係密切，呢類股有胡唔食、罪大惡極。

炒放榜隨時會損手

放榜股有喜有悲，但喜嘅少、悲嘅多，大昌行（01828）增長64%、股價升5.3%，渣打睇目標價20蚊，算幾誇張。放榜完大跌嘅股就大把，阜豐（00546）、匹克（01968）、雨潤（01068）、金蝶（00268）、台泥（01136）……部分仲係成績表合格甚至好過預期，最明顯例子係聯想（00992），攞高分仲要插6.5%。

績優股同績憂股都博唔過，惟有搵啲跌得差唔多嘅股博反彈，TCL通訊（02618）由9蚊插到5蚊樓下，業績係冇問題，PE同息率都係6字頭，淨係上半年已賣出接近2,000萬部手機，但管理層全年目標係賣5,000萬部，即係下半年要賣超過3,000萬部，計劃興建嘅廠房年產量最高1.3億部，有雄心係好事，但會唔會過分大想頭呢？

商場吸納內地旅客

息高嘅股始終有防守力，由於驚個市已完成反彈回復尋底格局，此時此刻又會諗吓領匯（00823）。家吓中電（00002）同電能（00006）嘅息率得番3厘半跑唔贏通脹，就算買「哎幫」（04208）依家要畀106蚊，變成未能同通脹掛鈎，領匯4.5厘息變得吸引，當然亦可以考慮尋日派成績表嘅祖國移動（00941）或者越秀房託（00405），但香港零售業嘅增長信心較大，個人遊已殺入尋常百姓家，屋邨商場亦變高檔。

領匯開始要向外面買商場，反映翻修本身商場已經八八九九，未來點樣提高股東回報要考管理層能力，但隻股勝在穩穩陣陣，暫時要打吓守勢波，食息補吓身好過亂咁博。

古勝