上星期，港交所（00388）真係非常黑仔，披露易網頁被黑客用殭屍程式攻擊，搞到大家心慌慌，最後要為七間公司突然停牌作出「沉重」嘅決定，都咪話唔陰功。
正如李總話齋，公司停牌是一個痛苦嘅決定，有散戶甚至覺得港交所好心做壞事，一班散戶諗住透過市場嘅波動性從中獲利，偏偏正股停牌令相關衍生工具停下來，升市又可能唔可以放貨，跌市又輸錢，散戶真係慘。有時見到港交所搞成咁，都非常唔「合皮」，做嘢只係睇住目前，危機意識相對薄弱，以為做咗一件好事，殊不知從來無睇清楚受影響朋友嘅真正需要，簡直係好心做壞事，事倍功半。
港交所近期決定將公布訊息渠道多元化，例如一連30日報紙刊登廣告，通知投資者邊間公司會有消息發布。理由解釋不倫不類，作為小散戶，喺資訊過分擴張年代，散戶要消化咁多資訊已經非常吃力，淨係識不斷發公告，話自己做咗就搞掂，又一次「做咗等於冇做」，真係無計。
計我話港交所首先要有危機管理意識，又有後備伺服器作支援，更要深化與香港財經媒體結盟，將資訊透明度同實時度大大提升。香港有咁多優質媒體同頻道，應該透過價值鏈整合，唔好孤芳自賞，咁香港金融市場美譽先可以維持同提升。
香港大學電子金融服務榮譽助理教授 徐燦傑