環球大冧市，投資者乜嘢貨都掟，但有樣嘢就因此好受歡迎，之唔係夾萬囉！點解啲人返璞歸真，鍾意喺屋企整番個夾萬？皆因經歷金融海嘯後，發覺冇一隻股票安全，依家連擺錢喺銀行都話要收錢，揸重現金及黃金嘅人深感要搵地方安置身家財產嘅話，屋企正正係最佳避難所！
喺美國一家名為Value Safes嘅夾萬店話，呢排大冧市令到佢哋嘅生意多咗兩倍，每日生意額有成13,000美元（逾10萬港元），售價只係170美元、1.2立方呎嘅SentrySafe牌迷你夾萬相當好賣，一日之內生意多咗四成，仲登上亞馬遜交易最多物品排行榜添。
既然夾萬變得咁重要，看守成副身家，所以就算經濟環境麻麻，好多人都會好捨得買個好嘅夾萬，防火、裝甲防撞呢啲以前叫做豪華裝置嘅夾萬，依家變成基本要求，售價15萬美元依然大有捧場客。
賣夾萬嘅Empire Safe就話，未見過啲人咁重視財產安全，因為以前財物損失後，佢哋仲有多餘錢彌補番，但依家咁嘅經濟環境，冇咗就冇錢買番。
余絲韻